Champion nomawi leh thawnthu hlui!Zarkawt khawtlangin hlim ruai an theh!

Champion nomawi leh thawnthu hlui!
Zarkawt khawtlangin hlim ruai an theh!
Lesde MBBA Inter Veng Basketball Tournament 2025, July ni 3 – July ni 18-a neih zawh taka champion veng – Mizoram basketball inpui, Zarkawt veng chuan team neitu Local Council huaihawtin an venga champion nomawi a tum khat nana a rawn haw pual hian Zarkawt Community Hall-ah August ni 1, tlai dar 4 khan lawmna an nei.
Kum 1984, January ni 16 khan Zosap Missionary pahnih Pu Buanga leh Sap Upa ten chanchintha hril turin Zarkawt veng ni ta, tuna MacDonald Hill-ah hian awmhmun an khuar a.
Kum 131 hnuah he lungawina tlang thawvengah ngei hian Zarkawt LC Manager Pi Rinsangi chuan, “Basketball hmuchhuaktu James Naismith khan Pathian rawngbawlna hmanrua atan he game hi a hmuchhuak a, keini pawhin he game hi chanchintha hril nan i hmang chhunzawm ang u,” tiin champion lawma pungkhawm mipui hmaah thu ropui leh chhinchhiahtlak a sawi.
He veng hian an champion theihna laimu team-te tana khawtlang leh kohhran an tawngtai nasat thu an sawi mawlh mawlh a; he thu hi MHIP aiawh atanga thusawite zawng zawngin an thunawn intawm a ni.
Inkhel en thulh thaka an veng aiawhte tana tawngtaite zu han awm nia – tawngtaina hmui atanga malsawmna zam chhuakin an tlangvalte thahrui a tichak tih hi finfiah nawn a ngai lo!
An LC chairman Pu Lalawmpuia Pachuau chuan, “He champion team neitu local council hun laia ka tel ve hi ka lawm takzet!” tiin a sawi a, he thu hian an veng hlimna hlimthla a phochhuak chiang hle.
Veng lian an ni lova, zirna avangin an thalai infiammite’n hmun dang an bawh nasa bawk nen tualchhunga an awm hun a inang lo hian an champion kawng hi a pawtsei tel a, sumdawnna hmunpui an nih tel cheu avangin an venga in tam zawk chu sumdawngte luah a ni.
A tawi zawngin sawi ila – India ram hmun dang angin he vengah hian mihring an tam tlurh lo! Chutih rualin, veng hlun an ni a, an ke penna lam ‘khawhar in riah tih tawp leh thlan lai tura mi dang rawih’ kalpui hmasa veng an ni a – a hun laiin sel leh dem thawm ri kha ring teh mah se, khawpui sukthlek her danglamtu an ni.
Champion, medal leh mi chhuanawm tak tak Synod Inkhawmpui thleng tur veng Zarkawtah hian an lo awm tawh thin a, tun tum tluka an veng inlungrualna hi an la tawng ngai lo ti ila, thu uar kan ni lovang. Chief Minister, Home Minister leh an ward corporator thu tawi sawi ngaihnawm thiam ten he hun hi an hmanpui.
An veng baller-te hnehna hlado chham thawm boruak hi a ringin bengkhawntu an tam thawkhat a, hall-a leng lo mipui fuankhawmin, mi 500 chuang tana lawmna ruai an buatsaih kiltu chu khawtlang hruaitute beisei aia tam an ni hial! An thalaite hlawhtlinna hian veng mipui a phuarkhawm thar tha hle.
An coach Dino-a hi lang lo lama ruahmanna ralthuam nena hmachhawp hisap chi a ni a, he zia ang nei player hi an tam tlat. An veng zia pakhat – ‘thu chuang tlai an ngah lo!’ hi veng dang leh infiamna huanga ring rawlh tawh phawt chuan entawn tham a ni.