Inzir
# Lawngtlai DAO huaihawtin nimin khan Lawngtlaiah International Year of Millet 2023 pualin buhtun (millet) thatna leh ching uar tura inzirtirna buatsaih a ni a. Lawngtlaia village council aiawhte leh kuthnathawktute an tel. District huapa hawnna ni pahfawma training buatsaih bakah hian Block hrang hrangah MzSRLM nen tangdunin training kalpui chhunzawm a ni dawn.
-- Advertisement --
Inkhawmpui
# January 20-22 chhung hian Mizoram Presbyterian Kohhran hnuaiah Bial KTP Conference hman a ni dawn a, Inrinni ah rorel inkhawm neih a ni ang. Bial thenkhat chuan thupui thlan bik neiin speaker-ten thu an sawi thin dawn a, bial thenkhatah chuan thupui thlanbik nei loin bial hruaituten an insawi chhawk dawn a ni. Central KTP leader Rev Dr F Pachhunga chuan Mualluangthu bialah a hmanpui dawn a ni.
END-in man
# Excise & Narcotics Department (END) & 42 Assam Rifles thawkdun chuan January 18 tlai dar 4.00 khan Ruantlang khaw bul, Farlui Road, Champhai district-ah heroin gram 580 leh mg 400 (hawng 50) an man a, a neitu nia sawi – Vanlalrina (32) Khawmawi Myanmar leh Vanlalsangliana (34) Venglai Champhaia khawsa intite an man bawk. END hian January 19 khan Phunchawng leh a chhehvel ramah dan loa zu siam an dap a, zu siamna hmun 30 chuang tichhia in, zu siamsa leh bungbel engemawzat a hmunah an tichhia.
Khualbuk
# DAY-NULM hnuaia Shelter for Urban Homeless component hnuaia cheng nuai 33.80 senga Mamit damdawi in pantu damlo awmpuitute khualbuk sak chu nimin khan Mamit bialtu MLA Er. H Lalzirliana’n a hawng. Khum 10 awmin mipa leh hmeichhe room a hrangin a awm a, choka a awm bawk. A chhung furnish nan UD&PA sum nuai 2 hman niin, a enkawlna (operation & maintenance) atan kum 5 chhung thlatin khum pakhat zelah Rs. 1000 ruahman a ni a, sum hi DAY-NULM in a tum dawn a ni. Khualbuk hi DMS Mamit leh a staff-ten an enkawl zui ang.