Lok Sabha MP C Lalrosanga chuan hmarchhak khawpui thenkhata service mek Fly Big Airlines chu Mizorama service tir ve dan sawipuiin an hotute a kawm.
January 15 khan Guwahati leh Itanagar inkara Fly Big Airlines thlawhna thlawk hmasaberah Mizoram MP hi chuangin an Airlines managing director nen Aizawla Fly Big service siam chungchang an sawidun a. Aizawl leh Imphal bakah Aizawl leh Shillong inkara Fly Big service tir dan dapin director of corporate affairs a sawipui bawk.
-- Advertisement --
Mizoram MP C Lalrosanga telna, Parliamentary Standing Committee on Health & Family Welfare chuan study tour neiin khawpui hrang hrang an tlawh a. Rilru hriselna leh TB veite enkawlna lama hmalakna enin hetiang enkawlna lama central leh state sawrkar hotute an kawm.
Tezpur-a Lokpriya Bordoloi Regional Institute of Mental Health-ah Parliamentary Standing Committee hian nen rilru lama harsatna neite enkawl dan leh hemi kawnga he institution hotute bakah central leh state sawrkar hmalakna an zirchiang a. An committee thutkhawmnaah C Lalrosanga chuan tunhmaa Tezpur Asylum tia mi ? dahkhawmna anga hriat thin he regional institute hi hmarchhak bial state dangte pawhin an chhawr tangkai zawk theihna’n tihphuisui zel tul a tih thu a sawi a. He institution-a course hrang hrang zirtirnaah hmarchhak zirlai tam zawk lakluh a tul tih a sawi bawk.
MP-te hian January 18 khan Guwahati-a AIIMS tlawhin Committee an thukhawm nghal a. Hmarchhak biala damlote mamawh phuhru thei khawpa AIIMS hi tihphuisui a tul an ti a. Assam sawrkar hotute kawmin Prime Minister’s TB Mukt Bharat Abhiyan leh Mental Health Management and Care chungchang an sawipui.
Hemi hnu hian Kolkata an pan a. West Bengal sawrkar hotute nen thukhawmin hriselna lama an hmalak dan an sawipui. UCO Bank leh Coal India hotute kawmin Parliamentary Committee chuan an hmalaknate an zawtfiah a ni.