Ni hnih chama Champhai tlawha thang Mizoram larsap Hari Babu Kambhampati chuan Ningani khan Champhai leh Zokhawthara company operating base (COB) – Zokhawthar Land Customs Station, SBI Zokhawthar Branch leh Pradhan Mantri Awas Yojana – Housing for All (Rural) hnuaia hamthatna dawngtu Zokhawthar amite tlawhin a kawm a. India leh Myanmar inrinaa lei dawh Indo-Myanmar Friendship Bridge leh border pillar-te a tlawh bawk.
-- Advertisement --
Larsap chuan ruihhlo leh dan loa thil tih man chhuah kawnga Assam Rifles hnathawh leh mipui hmakhua ngaia hmalakna leh, an thurualpui dangte nen tangtlanga khawtlang himna kawnga hma an lakna fakawm a tih thu a sawi a. Ramri ven leh ramri kaltlanga dan loa thih tih donaa mipui nena inzawmna tha tak an nei leh, an rawng bawlsak kawnga hma an lak chuan hmarchhakmite tana thiantha an nihna a tarlang a; health camp an nei thinte, a bikin lung lama harsatna neite enfiah kawnga hma an lakna chhuanawm a tih thu a sawi.
Ramri kaltlanga insumdawntawnna mumal zawk kalpui turin India a inhawn reng thu leh dan anga kalpui turin lehlam an inpeiha hma lak dun a pawimawh tih Hari Babu Kambhampati hian a sawi a. Khawtlang leh AR chu inpawh taka awm turin a chah.
Zokhawthar khawtlang hruaituten a hnena mamawh an thlen – ATM, health facility tihchangtlun leh tuldangte tihpuitlin a nih thuai theih nan a tul ang bawhzuia hma la turin line department official-te a chah a ni.
Larsap hian 42 Assam Rifles hnuaia COB – Champhai leh Zokhawthar a tlawh a. Ramri leh dan loa ramri kaltlanga thil tih venga hma an lak dan an lo hrilhfiah. Indo-Myanmar border thui tak awmna Champhai district-in India ram tan pawimawhna thuk tak a neih thu leh ramri awlsam taka daikai mai theih a ni leh thenawm ram buai vanga harsatna thlengte an sawi a ni.
Indo-Myanmar border veng turin kum 1958-ah Indian Army dah an ni a, an kut atang hian Assam Rifles chuan kum 1968 ah mawhphurhna an la a, district chhung khua 7 ah inkulhin, patrolling party 7 leh vehicle check post 8 an nei mek.
Land Customs Station (LCS) Zokhawthar hotute pawhin anmahni tlawhtu larsap hnenah hian ramri kaltlanga sumdawnna leh an hnathawh dan an lo hrilhfiah. LCS chhunga banking facility awm SBI Zokhawthar pawh tlawhin, bank kaltlanga hamthatna, abik takin social security scheme-te mipuiten an hmelhriata an chhawr tangkai ngei theih nana hma la turin a chah a ni.