Mizoram hmun hrang hrangah leh state pawnahte Zirtawpni khan Chapchar Kut hman a ni a. A hmanna pui ber Aizawl Sipai Lammuala neihah chief minister Zoramthanga chu Kut Pa niin, Kut thupuiah ‘Zofate Inpumkhatna’ tih hman a ni.
Kut Pa chuan Covid leng avanga kum hnih chhung pangngai taka Chapchar Kut hman theih a nih tawh loh hnu ah kuminah ropui taka mipui thahnem takin a huhoa kan hmang leh thei chu lawmawm a tih thu a sawi a. Kumin Chapchar Kut hi G20 hnuaia B20 meeting Aizawla nghah nen a hun a innan avang leh ram hrang hrang atanga he meeting-a tela lokalten Mizo Kutpui an rawn chhim ve theih phah chu lawmawm a tih thu a sawi.
Kut lawmnaah hian thenawm ram Myanmar leh Bangladesh bakah India ram hmun hrang hranga Zohnahthlak unaute tel ve tura sawmin state sawrkar pawh theihtawpin a inbuatsaih tih chief minister hian a sawi a. Kut thupui angin Mizoram chhung leh pawn, khawvel hmuntina awmte nen min suihkhawmtu, kan inpumkhatna lo ni zel se, tiin, harsatna karah pawh inpumkhatna chhawmnung zel turin Zofate a sawm tih a sawi a ni.
Mizoram Legislative Assembly speaker Lalrinliana Sailo chu Kut Thlengtu a ni a, hnam ziarang chawilar zel thiam a, pipute nun dan leh tih thin danah a thalo lai paih a, a tha lai chhawmnung zel tur kan ni, tiin, Kut hman danah pawh hlim taka lawmin, ruihhlo telloa inngeih tlang tak zela hmang turin mipui a sawm a ni.
Chapchar Kut pual hian Vanapa Hall-ah I&PR department buatsaihin photography leh painting exhibition neih a ni a. Aijal Club Park-ah flower show buatsaih niin, Lammualah hian ei leh in tur leh thuamhnaw leh a dangte zawrhna stall engemawzat hawn a ni bawk.
Chapchar Kut hi Mizoram hmun hrang hrangah leh state pawn hmun thenkhatah Zirtawpni vek khan hman a ni.
Chapchar Kut hman a ni Inpumkhatna chhawmnung zel ang – CM
Get real time updates directly on you device, subscribe now.