Mamit Aspiraltional District-ah state sawrkar leh district administration inthlahdah vangin central scheme hrang hrang hmalakna hmuh tur a awm mumal lo niin Union minister of state Faggan Singh Kulaste chuan a sawi.
February 28 khan ni hnih chamin sawrkar laipuia Union minister of state for Rural Development
Faggan Singh Kulaste hian Mamit district a tlawh a. Mamit district-a sawrkar department official-te meeting a neihpui a. Central scheme hrang hrang, sawrkar laipui sum hmanga hmalaknate thlirlet a ni.
Hemi hnua thuchah (press statement) a siamah, Mamit district-a mirethei in sak tanpuina – Pradhan Mantri Awas Yojna pek tura sawrkarin kum 2021-2022 chhunga a pawm tawh chhungkua 2237 leh central atanga sum pek vek tawh si ah, in 494 chauh zawhfel a nih thu leh, mi 1743 chu tunhnaiah PMAY hnuaia first instalment chauh pek an ni tih a sawi a, pawi a tih thu a sawi.
‘PMAY chungchangah 2022- 2023 chhunga hmalakna official report fel tak an nei hleithei lo chu a tha lo hle a. Mizoram sawrkara Rural Development secretary leh Mamit DC pawh an data kawl fello lai awmte tidik a, update data nei turin hriattir an ni,’ a ti.
Union MoS hian PMGSY kawng sial mek phase I & II siam zawh tur km.340 la siam zawh loh chu pawi a tih thu te, km.42 siam loh a la awm chu state sawrkar inthlahdah vang a nih thu te, PMGSY scheme phase-III hnuaia kawng siam zat tur leh ruahmanna official-ten engmah information an hre lo chu tha lo a tih thu te a sawi.
‘Ayushman Bharat Card (PM Health Care Scheme) te, school-a zirtirtu indaih lohna nasat zia te, zirna in hrang hranga a nih tura anga awm lo leh drop out rate san dan te, PM Free Gas Connection Scheme leh PM Kisan Niddhi, Mamit district-a vawi tam central minister-ten an tlawh a, hmalak dan tur DC hoa an sawi hnu pawha hmalakna hmuh tur awm lo hi state sawrkar leh district administration inthlahdah vang liau liau a nih avangin a pawi takzet a ni,’ a ti.
Amrit Sarovar (tui dahkhawlna) 75, kumin August 15 ralhmaa siam turin RD secretary leh Mamit DC te beisei an nih thu leh, MNREGA pawh Aadhar linked account hmanga langtlang taka engkim kalpui turin RD secretary leh Mamit DC te hriattir an nih thu a sawi bawk.
Ministry of Steel hnuaia Steel Authority of India Ltd. (SAIL) in an CSR fund-a ambulance pahnih an lei chu Faggan Singh Kulaste hian Mamitah a hlan nghal tih a sawi a. Ambulance hi Aspirational District chhunga health care lam tihthatna atana hman tur niin, kum khat chhunga an damdawi hman tur leh thawktu turte pawh SAIL hian a tum dawn tih a sawi ni.
Aspirational district-ah central scheme hmalakna hmuh tur awm lo – Union MoS for RD
Get real time updates directly on you device, subscribe now.