Chawibelh department kan ni tawh lo – Transport director

Transport director R Lalrammawia chuan Nilaini khan District Transport Office Lunglei tlawhin thawktute nen an inkawm.
Kum engemawti chhung chu chawibelh department anga ngaih thin ni mah se, kum thum liamta atang khan kalphung tidanglamin, tunah chuan thawktu leh lirthei indaih loh viau mah se, state sawrkara revenue chhung tam department an ni tawh a, bus service-ah pawh chawi belh tawh loin, hlawkna neiin an kal ve tawh tih Transport director hian a sawi.
Tunah hian Tranport department-in Mizoram pumah bus 26 chauh neiin, indaih lohna nasa tak karah Lunglei Town Bus Service tur pahnih an nei chu a lawmpui tih a sawi a. Tun aiin public bus hi mipuiin hmang tangkai lehzual turin a duh tih a sawi bawk. Kum hmasa lamah late fee chawi ngai loa motor registration leh document dang tih nun (renew) na hun rei tak siam a nih hnuah pawh, lirthei 58067 chu demand notice pek ngaiin an la awm tho tih Er Lalrammawia hian a sawi a. Heng zinga 5675 chu ‘not to be transacted’ a dah tawh niin, Lunglei registration nei motor 467 chu document valid nei tawh lo (blacklist) tur an ni tih a sawi a ni.
Transport Department Lunglei hian 2023 January to December chhung khan revenue Rs. 2,09,72,747 an lalut a; lirthei registered 2214 awmin, driving licence 2315 an pechhuak. Learner licence 3623 leh conductor licence 2 an pechhuak bawk.