Chawngte HSS ah zirtirtu dah loh chuan sikul kal tir loh tum

Kamalanagar Higher Secondary School-in Education leh Economics lecturer an nei loa, sawrkarin a dah mai loh avangin dah turin Mizo Students’ Union chuan June 4 ral hma ngeia dah turin an ngen. Sawrkarin a dah lo a nih chuan school tan tir loh an tum.
MSU Hqrs. Chawngte thuchhuah danin, Kamalanagar HSS-ah Education lecturer chu 2023 September 1 khan a pension a, a pension tawh hnuah sawrkarin a aiawh tur an dah mai loh avangin a mimal thahnemngaihna in hlawh pawh phut loin HSSLC exam hma zawng kha a thawk a, a chungah pawh an lawm hle tih a sawi.
Economics lecturer hi taksa lama harsatna a neih avangin 2023 October 1 khan Govt. Zemabawk Higher Secondary School Aizawlah sawn a ni a, a aiawh dah a la ni lo tih a sawi a ni.
Education leh Economics lecturer an neih loh avang hian zirlaiten harsatna an tawk nasa a, an result pawhin a tawrh phah tih a sawi a. Zirlaite harsatna tawh hi MSU Hqrs. Chawngte chuan a hriatthiampui a, 2024 June 4 ralhma ngeiin Education leh Economics lecturer dah turin sawrkar an ngen a, an ngenna tihhlawhtlin a nih loh chuan MBSE-in school tan hun tura a ruat June 5 hian Kamalanagar HSS zirlaite chuan school tan ve loh mai nise, tia an rel thu a sawi.