Chawnpui par nan Lalhriatmawia kut a mawi!

Hun pangai tawp nan second thum a la awm a, Chawnpui BC player Ruata’n free throw vawi hnih a hmuh chu a chhawr tangkai lo – Favang tournament atangin a club a liampui thuak!
Hun pangaiah RSC leh Chawnpui BC te 68-68 in an inhnehtawk zui ta nge nge a, hun pek belh (overtime) khelh a ni a, chak loh chuan Chawnpui BC an tla thei – veng pawn player pakhat chiah kawltu Chawnpui BC tan Hriatmawian hriat hlawh zui zel tur 3 pts a lut thaih a, semi finals lut chiang tawh RSC tan thawhchhuah ngaihna a awm tawh lo.
Hawla Indoor Stadium chhungah thlankhur chhunga phum bo tawh tura ngaih theih tawh Chawnpui BC tantute lawm avangin an inkuah nawk nawk, semi finals lut zui tlat hek.
He D League club Chawnpui BC hian pressure hnuaiah an that zia an pholang satliah lo, basketball thiam leh uar vengin a ken tel tualchhung hruaitu tha an neih te hlutna an chakna thawm thang ri karah hian hmuh theihin a awm tlat.
An club puipa te zinga mi, veteran baller Tlinga chuan, ‘kum 1989 khan tuna an club hi din a nih thu a sawi a, RSC an hneh chu vanneihna piah lamah record thlirletin zamna chhan tur a awm loh thu a sawi bawk – RSC hma ah hian Chawnpui BC hi a lian zawk an lo nih tawh thin thu’ a sawi nghe nghe.
He inkhelah hian RSC lamah Michael F, Tabawiha, Chhanhima, Hmingtea leh Dara te tal vel a hmuhnawm hle; Chawnpui BC lam erawh mimal khel tha fal bik awm lovin, team game an chhawpchhuak. Hriatmawia, Muanpuia, Ruata te hovin an phu ang ngeiin an club an chakpui – an vannei tel!
Inkhel hnuhnung zawk MSL huangah Khatla TBL in Saron BC an hneh zui a, tournament hmawrbawkna lam a en zui tlak hle.
Result

1. Chawnpui BC 81 – 76 RSC (D League)
2. Khatla TBL 85 – 81 Saron BC (MSL)

Zanina inkhel turte:

1. Bungkawn LBA vs Maxim SC (Women) 6:30 pm
2. Zarkawt BCA vs Ramthar Vanguard (MSL) 8:30 pm