Chelsea in champion Liverpool an hneh

Pathianni zan khan English Premier League (EPL) khelh chhunzawm a ni a, champions league khelh phak tum Chelsea chuan champion thar Liverpool chu 3-1 ngawtin an hneh. Panganaah Chelsea an insawh ngheh laiin Manchester United erawh chu Brentford hneh lovin an lo tlawm ve thung.
Chelsea 3-1 Liverpool
EPL-ah Liverpool an champion chiang tawh a. EPL atangin Southampton, Leicester City leh Ipswich Town te an tlahniam chiang tawh bawk. Champion tur leh tlahniam tur a chian tawh laiin top 5 huang luah a, champions league khelh phak tur a la chiang lo viau thung a. Champions League khelh phak tuma inelna boruak a nung tha hle.
Season lai hawl leh a tawp lam deuh thlenga chetha hleithei lo Chelsea chu season tawp hnaih lamah an hlauhawm thar a, an chak thei ta riau. Top 4 huanga inhlangkai hman hian Blues hian Stamford Bridge-ah champion thar Liverpool mikhualin an mualah ngei fiahna hautak an hmachhawn. Chak an mamawhna inkhelah team tha an nihzia an lantir a, 3-1 ngawta hnehna changin UCL an hnaih leh zual.
Chelsea hian an mualah bul an tan tha viau a, inkhel tan atanga minute thumna lekah captain Enzo Fernández chuan hmahruaina goal a thun nghal. Hma takah goal an thun vangin an phur viau a, chak tlang tumin tan an khawh nasa hle. Inkhel hmuhnawm takah goal a luh belh theih loh reng hnuin Chelsea an vannei nawn leh. Minute 56-naah Liverpool player Jarell Quansah chuan an lamah a ti-goal a, mualneitu goal hnihna a thunsak.
Chelsea lakah si hnih an phurh hnuin Reds in goal thun ngei tumin tan an khawh a, an khingpuite an nawr nasa hle. Goal thun theihna hun tha nei bawk thin mah se Reds an vannei hlei thei lo. Goal an thun theih loh reng hnuin Virgil van Dijk chuan minute 85-naah goal thunin an si phurh a sut then.
Van Dijk goal thun vangin Reds an phur thar viau a, tlawm pumpelh tumin tan an khawh nasa hle. An si phurh sut tuma tan an khawh viau laiin an chesual leh ta tlat thung a, penalty an chawi. Penalty hi Cole Palmer chuan minute 90’+6 a pet goal a, an chakna a nem nghet a, champion thar Liverpool lakah hnehna an chang zui ta a ni.
Liverpool laka point thum an hmuh hmangin Chelsea hi panganaah an insawh nghet. Blues hian khelh 35 atangin point 63 an hmu a, champion thei em tawh lo mah se pahnihna ni thei dinhmunah an la ding. Pathumna awm mek Manchester City nen point khat chauhin an inthlau mek a, pahihnaa awm Arsenal an phak lohna pawh point li chuah a ni mek bawk. Heti a nih lai hian pasrihnaa awm mek Aston Villa nen an inthlauhna pawh point thum chauh a ni ve mek bawk. Hei hian top 5 huang luah phak tuma inelna a natzia a lantir chiang viau awm e! Tarlan tawh thin angin season thara champions league-ah EPL club panga an inlan thei dawn a. Season dang zawng aiin tun season-ah hian pangana nih a hlu leh zual dawn a ni.
United an tlawm leh tawh
Europa League-ah chetha bawk mah se EPL-ah erawh chuan Manchester United leh tlawm an inhmeh viau rih. EPL-a talbuai, 14-na chhuahsan hleithei lo United hi Brentford lakah 4-3 in an tlawm leh ringawt.
Gtech Community Stadium-a Brentford hmachhawn tura lenglut United in bul an tan tha a, goal thun hmasa zawkah an tang. Inkhel tan atanga minute 14-na Mason Mount chuan hmahruaina goal a thun nghal. Europa League-ah Athletic Bilbao sawp zo hlim United hi mikhual an nihna hmunah goal an thun hmasak vangin an phur hle a, mah se an phur rei thei lo tlat thung.
Goal an chhuah hnuin Brentford in an mikhualte an nawr zui chiam a, an vannei zui thuai. Minute 27-naah United defender Luke Shaw chuan an lamah a ti-goal a, Brentford si phurh a sut sak. An si phurh an sut hnu lawkah Brentford tan Kevin Schade chuan hma an hruai letna goal a thun nghal zat a, 2-1 a hmahruai chungin chawlhlawk an hmang.
Chawlhlawk hnu lamah Brentford an khel tha chhunzawm a, inhnaihchilh takin goal hnih an thun belh leh. Mualneitu Brentford tan hian Kevin Schade chuan minute 70-naah awlsam taka tauh goal in an hmahruaina a tizau a. Schade goal thun atanga minute lina lekah chiang taka United tlarhnung an thiah hnuin Yoane Wissa chuan awlsam takin a pet goal zi leh a, team lian United lakah 4-1 ngawtin hma an hruai zui ta a ni.
Brentford lakah si thum ngawt an phur a, an game an that lem loh bawk vangin United an mualpho ngei tura ngaih a ni a, goal dang an chhuah belh leh mai pawh a rinawm hman. Mah se, United hian team huaisen an nihzia an lantir thung a, tlawm pumpelh thei bik lo mah se goal hnihin an khingpuite an chhanglet.
Thlasik bazar laia Old Trafford chhuahsan teuh tak Alejandro Garnacho chuan minute 82-naah mawi taka goal thunin an si phurh a sut then a. Hun pek belh minute 90+5-ah Amad chuan an goal thumna a tun zui leh bawk. Goal chhuah zawn mah se Brentford in goal an chhuah belh tawh lova, an mualah point thum hlu tak an hmu.