Chelsea in United an hnar

Chelsea in United an hnar
Manchester United chuan England midfielder Mason Mount chu Chelsea atanga lak tumin an dawr a. United in Mount lei tuma an dawrna hmasa chu Chelsea in an hnar.
Manchester United hian Mason Mount hi £40m a lei tumin Chelsea an dawr a, an sum tawktarh hi a tlem an tih vangin Chelsea in an hnar nghal. Chelsea-ah kum khat chauh contract nei tawh mah se Mount manah hian Blues hian £70m zet an la chhiar fan a, hetiang zat em em a lak chu United hian an hreh. United hian England captain Harry Kane chu Tottenham atangin lak luh viau mah se Spurs in Kane hi an chhiar to em vangin an ngaihven zui tawh dawn lo va, Mount hi an ngaihven chhunzawm leh dawn em a la chiang lo.
Kum 24 mi Mason Mount hi Chelsea academy atanga inzir chhuak a ni a, Chelsea senior team-ah hmun a chan hmain Vitesse Arnhem leh Derby County te loan in a zawm tawh. Kum 2019 atang khan Chelsea first team-ah hmun a chang tan a, champions league 2020-21-ah an champion theih nan a thawhhlawk hle. Blues player pawimawh tak ni thin mah se a pawimawhna a hloh chho tial tial a, season liam ta khan vawi 20 chauh a khel ta thung. Neitu thar hnuaiah hausa thar a, player an lak luh zawih zawih hnuin Mount hian hmun pawimawh a chang phak tawh lo. Player lei nana sum seng hnem Chelsea hian Financial Fair Play rules bawhchhe lo turin player hralh an mamawh a, hei vang hian Mount hi hralh an pawi ti lo.
Mount hian kum 2019 atanga tun thlengin Chelsea tan vawi 195 khelin, goal 33 a thun tawh. September 2019 atanga khan England tan a khel tan a. Three Lions tan hian vawi 36 khelin, goal 36 a thun tawh. Club leh ram tan tawnhriat nei tha tak a nih vangin United manager Erik ten Hag chuan an mual lai thuamchaktu atan a duh viau a, lak tumin hma an lak chhunzawm rin a ni.