Croatia in Nations League final an lut

June 14, Nilai zan khan UEFA Nations League semi-final hmasa zawk khelh a ni a. Netherlands lakah si an phurh hmasak zet hnuin Croatia chuan extratime-ah hnehna an chang let a, final an lut. Croatia hian pathianni khelh tur final-ah Italy leh Spain te inkhela chak zawk zawk an hmachhawn ang.
Nations League semi-final hmasa zawkah hian De Kuip, Rotterdam-ah mualneitu Netherlands in bul an tan tha a, goal thun hmasa zawkah an tang. Team lian zawka ngaih an nih bakah an muala inlan an nih bawk vangin Netherlands hian final lut turin rin an kai viau a, goal an thun hmasa bawk nen final an hnaih hman hle. Chawlhlawk hnu lamah Croatia an khel tha a, hma taka an si phurh an sut hnuin hmahruai letna goal an thun har lova, hun tawp dawn tepah goal chhuahin, hun pangngaiah 2-2 in an inhnehtawk a. Croatia hian extratime-ah goal hnih ngawt an thun belh ta thung.
Inkhel hmuhnawm takah hian Netherlands tan Donyell Malen chuan hian Wieffer siamsak atangin minute 34-naah hmahruaina goal a thun a. He goal hmang hian si khat faia hmahruai chungin chawlhlawk an hmang.
Chawlhlawk hnu lamah mikhual team Croatia in bul an tan tha ve thung a, an si phurh sutna goal an thun thuai. Croatia hian minute 55-na lekah penalty an hmu. He penalty hi Andrej Kramaric chuan awlsam takin a pet goal a, an si phurh a sut.
Goal khat ve ve a luh hnuin inkhel a hmuhnawm zual sauh. |antu nei tha zawk Netherlands in goal thun tumin thapui thawh thin mah se Croatia tlarhnung player te inkawp fuh tak an paltlang hleithei lo. Goal an thun hnua inringtawk thar Croatia an hlauhawm chhunzawm a, goal thun hmasa zawkah an tang leh ta nge nge. Minute 72-naah Mario Pasalic chuan Ivanusec siamsak atangin hma an hruai letna goal a thun.
An mualah ngei hnufual zawk an nih hnuin Netherlands in an si phurh sut ngei tumin tan an khawh a, Croatia in an hmahruaina venhim an lo tum ve bawk nen inkhel a hmuhnawm leh zual hle. Netherlands hian hun pangngai tawp thlengin an si phurh an sut thei lo va, hun pek belh tawp dawn thlenga an si phurh an sut theih loh vangin Croatia hi chak ngei tura ngaih a ni hman tawh. Tlawm ngei tura ngaih ni tawh mah se Dutch team in huaisen an chhuah chhunzawm a, goal an thun ta hial bawk. Minute 90+6-ah Noa Lang chuan buai nuaih nuaih karah tha takin a pet goal a, vanneihthlak angreng takin an si phurh a sut. An si phurh an sut hnuin hun a tawp zui a, hun pangngaiah 2-2 in an inhnehtawk.
Hun pangngaiah chak zo bik lo mah se extratime-ah Croatia in bul an tan tha viau a, goal an thun thuai. Fuh taka ball an inpek kual hnuin minute 98-naah Bruno Petkovic chuan hla de daw atangin a pet goal a, hma an hruai nawn lehna goal a thun. Hma an hruai nawn leh hnuin Croatia hian goal an thun belh zui teuh hle a, Frenkie de Jong cross hlauhawm tak chu goal-ah an chantir teuh hle a, vanneihthlak takin Ronald Koeman a team te an him hlauh.
Si phur zawka an tan nawn leh hnuin Netherlands in an si phurh sut tumin tan an khawh a, goal thun teuh viau mah se Croatia si nghak an paltlang zo lo. Goal thun an mamawh em em laiin Tyrell Malacia chuan penalty a chawi leh tlat thung. He penalty hi senior player Luka Modric chuan minute 116-naah pet goal in an hmahruaina a tizau. Hun tawp dawn hnaihah tha zeta an khingpuite nawr tlangin Croatia hian goal an thun belh zui leh a, hei erawh hi chu offside vangin hnawl a ni thung. Goal dang luh belh lovin inkhel a tawp a, Croatia chuan 4-2 a Netherlands hnehin final an lut ta a ni.
UEFA Nations League final khel tur Croatia hi international final an khelh vawi hnihna tur a ni a. World Cup 2018-ah khan final-ah 4-2 a France hneh lovin an lo vanduai tawh a. Pathianni zana final khelh turah hnehna changin, champion ngei an tum ang.