Chelsea leh Crystal Palace insual tawk!

Chelsea leh Crystal Palace insual tawk!
Stamford Bridge-a season bul tan Chelsea chuan an mikhual Crystal Palace lakah goal khung zo loin team pahnih hi Pathianni zanah goal awm loin an inhnehtawk ringawt!
An tuma chiang Eagles lakah mualneitu team khan ‘clear chance’ han tih tur ang chi kha siamchhuah an harsat tlat a; chutih laiin midfielder Eberechi Eze khan a free-kick goal pui zet a chhuihluh hmangin Palace tana a game hnuhnungber ni thei mai turah lasi thawnthu anga tawp khar theihna hun tha a nei a, mahse, VAR check kalpui a nih hnuah referee Darren England chuan goal loah a ham!
Kum 27 mi Eze hi Tottenham target pakhat niin, inbiakna pawh a la kal mek a, Pathianni zanah pawh khan a inlan lo mai ang em tih zawhna a pian hman laiin Stamford Bridge-ah mikhual team tan bul a tan a; minute 13-na lekah pen 20 vela hla atangin free-kick a chhuihlut a, mahse, free-kick chhuih lai khan Liverpool nena sawizawm mek Palace defender Marc Guehi chu Chelsea wall atanga metre khat chhungah a lo awm tih man chhuah a ni a, Eze goal a goal loh leh phah!
He dan hi kum 2019 atanga hman tan kha niin, khelmual chhunga lekkawh erawh a ni khat hle a, an chelek kan hmuh pakhatah a tuartu chu Palace an ni a; mikhual team hian striker Jean-Philippe Mateta leh Maxence Lacroix-te hmangin an hun tha neih an bawhpelh bawk a, a tir lamah khan team tha zawk an ni tih an pholang.
Inkhel tan hmain Chelsea khan an khelmualah kumin nipui laia world champion an nihnate han lawm ngial bawk mah se inkhel an tan a, first half chhungin an khel tha hran lo hle a; an chance neih that ber berte chu second half-a substitute debutant thiau Estevao Willian, Liam Delap leh Andrey Santos-te kut zala tla a ni.
New Jersey khaw Club World Cup final-a Paris St-Germain an hneh atanga ni 35-na chiahah Chelsea khan league season an tan a; Fifa tournament avangin pre-season inbuatsaihna chu club tam zawk aiin an neih tawi phah a, a huhoa inbuatsaihna hi ni 13 chiah an kalpui hman.
Pathianni zan khan Blues tana league debut nghakchhuak player panga awmin, chu’ngte chu – Estevao, Delap, Santos, Joao Pedro leh Jamie Gittens-te niin, tun nipui bazar laia buai tak Stamford Bridge club-in an mitharte an hlawkpui nghal mai rih lo!
Pathianni Premier League inkhel dangah Nottingham Forest chuan 3-1-in an mikhual Brentford an hneh thung.