Chelsea tawnah Barcelona an nem

November 25, Thawhleh zan khan UEFA Champions League khelh chhunzawm a ni a. Chelsea chuan Stamford Bridge-a an mikhual FC Barcelona chu 3-0 ngawtin an lo sawp. La Liga champion Barcelona hi Chelsea tawnah tui ang an nem. Inkhel dangah Borussia Dortmund leh Juventus ten hnehna an chang ve bawk.
Chelsea in Barca an ngam
Stanford Bridge-a inkhel ngaihven hlawh takah Chelsea in an mikhual Barcelona an ngam viau a, own-goal leh red card an chhawr tangkai viau bawk. An mualah chak ngei tuma inlan Blues hi vannei hmasaah an tang a, minute 27-naa Jules Koundé own-goal hmangin hma an hruai. Goal thun belh tumin an mikhualte nawr zui viau mah se chawlhlawk hmain an hlawhtling thei tawh bik lo. An si phurh sut tuma tan khawh nasa tak Barcelona an chesual nawn leh a, minute 44-naah defender Ronald Araújo hnawhchhuah a ni. Si khat phur chung leh tlem zawk ni chungin La Liga champion in chawlhlawk an hmang.
Chawlhlawk hnu lamah tam zawk ni chunga inlan Chelsea an khel tha leh zual a, goal hnih an thun belh. Blues tan hian kum18 mi Estêvão chuan minute 55-naah an goal hnihna a thun. Rawlthr ngaihven hlawh Lamine Yamal boruak lian tak chu Estevao hian a vaw dai a, langsar zawkah a tang.
Si hniha hmahruai tawh Blues tan hian Liam Delap chuan minute 73-naah an goal thumna a thun zui leh a, an chakna a nemnghet. Delap goal thun hnuin goal dang a luh belh tawh lova, Chelsea chuan an mikhual FC Barcelona chu 3-0 ngawtin an lo sawp a, point thum hlu tak an hmu.
Champions League, league round khelh mekah Chelsea hian vawi 5 khel tawhin point 10 an hmu a, panganaah an awm mek. Nilai zanah UCL khelh chhunzawm a ni a, Chelsea dinhmun hi danglam thei a la ni thung. Panganaah Chelsea an awm laiin FC Barcelona erawh chuan khelh nga atanga point 7 hmuin 11-na an luah ve thung.
Dortmund an chak awlsam
Thawhleh zana inkhel dangah German club lian Borussia Dortmund an khel tha chhunzawm a, an mikhual Villareal chu 4-0 ngawtin an lo sawp.
An mualah 4-0 ngawtin chak bawk mah se Dortmund hian goal an thun hma thei bik lo. Goal lut a awm theih loh reng hnuin Serhou Guirassy chuan chawlhlawk dawn hnaih minute 45’+2-naah hmahruaina goal a thun hram a, 1-0 a hmahruai chungin chawlhlawk an hmang.
Chawlhlawk hnu lamah Dortmund an khel tha chhunzawm a, an vannei tel bawk. Minute 52-na lekah Villareal player Juan Foyth hnawhchhuah a ni. Tam zawk an nih vagin Dortmund an phur leh zual a, goal pawh an thun belh leh thuai. Goal hmahruai thuntu Guirassy chuan 54-naah an goal hnihna a thun a. Club lian zawkten an hmuh taih em em Karim Adeyemi chuan minute 58-naah an goal thumna a thun hnuin Daniel Svensson chuan minute 90’+5-naah an goal lina thunin a tawp a khar a, an mualah awlsam takin point thum an hmu zui ta a ni.
Borussia Dortmund hian khelh 5 atangin point 10 an hmu a, palinaah an awm mek. Hetihlai hian Villareal hian khelh 5 atangin point 1 chauh an la hmu a, 34-naah an awm mek ve thung a, an dinhmun a tha lo hle.
Juventus an chak tlai
Thawhleh zana inkhel dangah Serie A club lian Juventus chuan harsa takin hnehne an chang a, mualneitu Bodo/Glimt lakah 3-2 a chak hramin point thum hlu tak an hmu.
Bodo/Glimt hian an mikhual Juventus lakah goal an thun hmasa a, Ole Didrik Blomberg chuan minute 27-naah hmahruaina goal a thun. Chawlhlawk hmaa an si phurh an sut theih loh hnuin Juventus tan Loïs Openda chuan minute 48-naah goal thunin an si phurh a sut a, Weston McKennie chuan minute 59-naah hma an hruai letna goal a thun. He goal hi an chakpui tep laiin penalty an chawi a, Sondre Brunstad Fet chuan penalty pet goal in Bodo/Glimt si phurh a sut.
An inhnehtawk mai a rinawm hman viau laiin Juventus tan Jonathan David chuan minute 90’+1-naah goal pawimawh tak a thun a, hnehna an chanpui. David goal thun hi chakpuiin harsa takin point thum an hmuh theih phah ta a ni.