City an tlawm leh tawh

On Nov 27, 2025 3 0

Thawhleh zana UEFA champions League khelhah Manchester City chu an mikhual Bayer Leverkusen hneh lovin an tlawm. An mualah an tlawm vangin City hian hmahruaitu nih lai lawk theihna hun tha an neih an chhawr tangkai thei lo. Manchester City an tlawm lai hian Italian champion Napoli in an mualah hnehna an chang ve thung.
English club lian Manchester City hi season kal mekah an khel tha tluang hlei thei lo. Pathianni zan khan Newcastle United hneh lovin an tlawm a, EPL-ah vawi 12 khelin vbawi li ngawt an tlawm der tawh. EPL-a an tlawmna ata thochhuak a, UCL ah insiamthat tum viau mah se an hlawhtling zo lova, German club lian Bayer Leverkusen lakah 2-0 in an mualah ngei an tlawm leh ringawt.
Etihad Stadium-a lenglut Leverkusen hian rin phak bakin an khel tha a, goal pawh an thun har lo. Inkhel tan atanga minute 23-naah Alejandro Grimaldo chuan hmahruaina goal a thun. Goal an chhuah vangin City in goal thun tumin tan an khawh nasa viau a, an mikhualte an nawr na thei hle. Hlauhawm siam bawk thin mah se a tawp an khar tha thei tlat lo thung a, si khat faia hnufual zawk chungin chawlhlawk an hmang.
Chawlhlawk hnu lamah German club Bayer Leverkusen an khel tha chhunzawm a, goal an thun belh leh thuai. Minute 52-na lekah Patrik Schick chuan an goal hnihna thunin City a barakhaih nawn leh. Team lian City lakah si hnih faiin hmahruai mah se Leverkusen tan a thlamuanthlak loh viau a, City nawr na tak ata him tumin thapui an thawh nasa hle. City in nawr na viau mah se hun tawp thlengin an invenghim thei hram hram a, Erling Haaland meuh pawh goal thun thei lova siamtu Leverkusen hian point thum hlu tak an hmu zui ta hial a ni.
An mualah chak se City hian point 13 an hmu ang a, table hmahruaitu lailawk niin last 16 an hnaih kuarh dawn. An mualah an tlawm vangin an hun tha neih chu uiawm takin an hloh a, khelh 5 atanga point 10 hmuin paruknaah an awm phah ta zawk. City hnehtu Bayer Leverkusen hian khelh nga atangin point 8 an hmu a, 13-naah an awm mek a ni.
Napoli an chak
Thawhleh zana inkhel dangah Italian Serie A champion Napoli chuan an mikhual FK Qarabag chu 2-0 in an hneh a, point thum an hmu ve bawk.
Napoli hian an an mikhual Qarabag lakah goal thun lawk thei lo mah se hun tawp dawn hnaih lamah goal hnih an thun ta hlauh. Arsenal pawhin lak an tum nia an sawi mek Scott McTominay chuan minute 65-naah hmahruaina goal a thun. Serie A player tha ber McTominay goal thun vangin Napoli an phur viau a, na zawkin an khingpuite an nawr. Na taka an nawr rah an seng a, mikhual team player Marko Jankovic chuan minute 72-naah an lamah a ti-goal palh a, an tlawm zui ta a ni.