Cheng 100 thir hi RSS ten Hindu lal ram siam an tumna: Thanzara

Cheng 100 thir hi RSS ten Hindu lal ram siam an tumna: Thanzara
MPCC President Lal Thanzara chuan RSS kum 100 tlin lawm nana PM Modi-an Cheng 100 thir a tlangzarhah Hindu pathiannu “Bharat Mata” bakah RSS volunteer-te kum 1963 Republic Day parade tarlan a ni chu demawm a tih thu sawiin, “Thiam taka RSS tena India ram Hindu lal rama siam an tumna kal zel a ni,” a ti.
He thu hi MPCC President hian nimina Congress Bhavan-a Congress party-a mi thar a lawmluhnaah a sawi a; MNF atangin voter 13 leh ZPM atangin voter pakhat a lawm lut a ni.
Lal Thanzara chuan, Hindu kulhmuk pawl Kristiante nekchep leh kan missionary-te pawh missionary inti ngam lo khawpa siam mektute kum 100 tlin lawm nana Prime Minister-in ‘100 rupee coin’ a tlangzarh hi RSS tena an pawm ngai loh leh siam danglam an tum reng leh an chak em em ‘Constitution of India’ hmuhsitna a ni a, a demawm tak zet a ni, a ti.
MPCC President chuan Airport kawng, Sihhmui rama Tlawng kai lei chu dawh zawh atanga ni 180 hnuah pawh an la hawng thei lo cheu chu department lam thiam loh nge, Contractor thiam loh tih a hriat mai loh a. Congress party chuan kan enchhin sorkar hian a thiam loh a ni tih pawm se la, peih thuai turin kan phut tlat a ni, a ti.
“NLUP fak em emtu, a awmna apianga thusawi dang leh thin CM kan nei hi a vanduaithlak. NLUP hmalaknaa kan hlawhtlinna an hre duh a nih chuan ‘Hmasawnna Lamtluang’ lo en ve turin kan duh a ni,” a ti bawk.
“Kan sawrkar leh a nih chuan, sport infrastructure kan neihte hi a enkawl hna Sport Association hrang hrang hnenah kan hlan leh dawn a ni,” tiin MPCC President Lal Thanzara chuan a sawi bawk a ni.