Chess khel rei record siam

Chess khel rei record siam
Nigerian chess player Tunde Onakoya leh NM Shawn Martinez te chuan New York-a Times Square-ah ngei mai darkar 64 chhung zet chess khel dunin, Guinness World Records an siam.
April ni 17 atanga khel tanin, April ni 20 zing lamah an game an titawp ta a, Onakoya chuan, “Theih loh tura ngaih chu kan puitlin a, khawvelin thil thar a hmu ta e,” a ti a, Martinez chuan, “A hautak ngar ngar khawp mai. Tunah tak chuan sawi tur ber pawh ka hre lo,” a ti ve bawk.
A tirah chuan darkar 70 chhung chess kelh hi an tum a, mahse, darkar 64-ah an duhtawk ta zawk a, Onakoya chuan, “Darkar 64-a kan tawp tak zawkna chhan chu chessboard-a square awm zat chiah a nih vang a ni. A inhmeh riauin kan hria a,” a ti.
A hmaa hetiang record chu 2024-a Norwegian chess player Odin Blikra Vea leh Askild Bryn te siam niin, anni hian darkar 61 leh minute 3 leh second 34 an khel ve thung.
Guinness inkaihhruainaah chuan record siam tur hian darkar khat chess an khelhah minute 5 zel chawlh an nei theia, he an chawlh neih hi minute 30 a tlin thleng an khawl thei. An chess khelh danah chess khelh dan dik tak an hmang ngei tur a ni a, tul lo a hun khawhralna lam chi a awm tur a ni lo. An inkhel lai hi kil hrang hrang atangin video a lak reng a ni bawk.
Onakoya, kum 39, hi FIDE rating-ah 2197 niin, Chess in Slums Africa dintu a ni a, he pawl hi Africa-a naupang rethei zawk ten ziak leh chhiar an thiam theih nana chess hmanga hna thawktu niin, Onakoya hian naupang rethei zawk ten zirna an neih theih nana hmalak nan dollar maktaduai khat tal tuak ngah tumin hma a la mek a ni.
Martinez hi American national master leh chess coach a ni a, pawl ruk a zirlai atanga chess khel tan tawh niin, ani pawh hi New York City-a thalai ten chess coaching an neih theih nana company Pushing Pawns dintu a ni.