Chhamb Battle Honour Day-ah tel dawn
Kum 1971-a Chhamb indonaa tel Mizo sipai intelkhawm, Ex-Fighting Fifth Association member-te leh an chhungte mi 53 chu March 23-25 chhunga Kalimpong West Bengal-a Chhamb Battle Honour Day vawi 50-na leh 5th Assam Regiment kum 60 tlin lawmna hmang turin Thawhlehni zing khan Aizawl an chhuahsan a, MJA Gen. Hqrs president C Lalrambuatsaiha’n a vailiam.
Chhamb Battle Honour Day Golden Jubilee lawmnaa tel turte a vailiamnaah MJA president chuan, India sipaiah Mizo tam tak an lut tawh tih a. Mizo sipaite an chhuanawm em em thin a, indona hmunah pawh rál hmatawngahte awmin, huaisen takin ram tan an lo bei tawh thin a, Mizote min tihmingthatute an ni, tiin a sawi a. Tluang tak leh hlim taka hun hmang turin duhsakna a hlan tih a sawi.
Ex-Fighting Fifth Association (EFFA) member-te hi East Pakistan (tuna Bangladesh) in zalenna a sual lai, 1971 December 3-17 chhunga Chhamb Sector, Jammu & Kashmir-a India leh Pakistan indonaa telte an ni a, he indonaah hian India chuan Pakistan a hneh a ni. Indonaa tel 5th Assam Regiment-te chu India sawrkar chuan battle honour pein, 1971 indonaa battle honour a pek awmchhun an ni. Kum 1971-a East Pakistan-in zalenna a sualnaah India-in East Pakistan lamah Pakistan a do a, chu chuan Jammu & Kashmir lama Chhamb Sector lam pawh kangkaiin, Chhamb Sector-ah hian 1971 December 3-ah India leh Pakistan an indo tan a. Chu indonaah chuan 191 Infantry Brigade hnuaia awm 5th Assam Regiment sipaite pawhin Pakistan an do a, a hnuah India chuan Pakistan a hneh ta a ni.
EFFA hruaitute sawi danin, Chhamb indonaah hian Mizo sipai 180 chuang an tel a, Mizo sipai zingah hliam engemawzat awm mah se, thi an awm lo a ni.
Chhamb Battle Honour Day-ah tel dawn
Get real time updates directly on you device, subscribe now.
Next Post