Chhetri tel loin India hlawhtling zo dawn em?
Indian football team chuan thla hnih an chawlh hnuah nimin atang khan Chiang Mai khawpuiah ram pali inelna King’s Cup tournament an khel tan a, captain goal thun thei Sunil Chhetri tel loin Igor Sti-mac-a team hian eng dinhmun nge an luah dawn sawilawk theih a ni rih lo.
Tunhnaia Intercontinental Cup and SAFF Championship title an lakna kawngah Chhetri hian a thawhhlawk a, kumin March thla Imphal khuaa Tri-Nation tournament hnehna an chan nen trophy pathum an lakzawn hnuah India hian an captain chhuanvawr tel loin Thailand an pan a; India squad-ah hian Mizo player pahnih Lalchungnunga leh Lallian-zuala Chhangte hmuh tur an awm nghe nghe.
Tuntum tournament-a Chhetri tel loh chhan hi a nupuiin fapa a hrinsak hnua a chhungte kianga hun tam zawk han hman ve zawk a duh vang a ni.
King’s Cup-ah hian Fifa ranking-a India aia rahbi 29 laia sang Iraq chu India elpui lian ber tur niin, tunhnaia Arabian Gulf Cup-a champion hlimhlawt an ni bawk a, he Arab team avang hian Chhetri an mamawhna sang sawt tura ngaih a ni.
He four-nation tournament-ah hian round robin match hnih khelh hnuah Pathiannia final khel tur tihchian a ni ang.
India hian an bultanna inkhel result tarlan hman lohah nizan khan Iraq hmachhawnin, inkhel dangah a thlengtu Thailand leh Lebanon an insu zui ve leh a, final lut zo lo team pahnihin bronze medal an inchuh ang.
Iraq hi India tan team lian niin, vawiruk an intawn tawhah India a la chak ngai lo a, vawili tlawmin, vawihnih an draw ve hram a ni!
Tun tournament hmaa India leh Iraq insut hnuhnunber chu 2011 Asian Cup-a sihnih faia Blue Tigers tlawm tum kha a ni.
India coach Stimac chuan pre-match media conference-ah team khawng Iraq laka a naute’n an theihtawp an chhuah tur thu sawi chungin, “Oman, Qatar leh Saudi Arabia, they are one of the clear favourites in the upcoming Asian Cup pawh hneh zo hlimhlawt an nih avangin kan tan beih an khirh takzet dawn a, mahse, ka naute hian nuamti taka an khelh ka beisei,” a ti.
Iraq coach Jesus Casas hi Stimac-a junior a lo ni tawh thin a, Spanish club Cadiz CF-ah awmdun tawhin, chutih lai chuan Casas hi youth team player a ni a, kum 1992 atanga 1994 chhung khan season hnih Stimac hi Cadiz senior team tan a lo khel ve tawh a ni.
Tunhma lama Iraq coach nen an lo inzawm tawh dan sawiin Stimac hian Spain rama a inkhelh thin laia a thin hlui nena intawn leh chu hlimawm hle dawnin a sawi.
Casas pawh hian India chu zah lo takin a en bik lo a, nizan game thlirlawkin, “India tum hi a awlsam dawn lo. An inkhel kan en fo a, team tha tak leh inthlungkhawm tha lutuk niin, goal bawh dan an hre hle a, short ball leh long ball thiamkawp an ni. Chutih laiin keini hian champion tumin he hmun hi kan rawn pan a,World Cup qualifiers atana inbuatsaih kal mek kan ni bawk,” tiin.
Ram tana goal 92 puitlin tawh star performer Chhetri tel loin Blue Tigers hian Asian football powerhouse-te zinga chhiartel kumkhua Iraq an hneh a nih chuan an result sualchhuah tawh zinga tha ber pawl a tling ang!
Delhi tuiliak Sunil Chhetri awm loh hlana India innghahna tur ni leh mek chu 2022-23 AIFF Player of the Year dawng tura thlanchhuah Lallian-zuala Chhangte hi niin, tunhnai kumli liamta chhunga India player hma-sawn chakber ang hiala sawi Lunglei tlangval hian Curacao khawpuia 2019 King’s Cup semi-final match-ah khan a vawithumna atan India tan starting line up a luah a; tunlai hian a national team career-a a vanglai hmang chho mek niin, Intercontinental Cup leh SAFF Championship-a an champion tum khan final pahnihah goal a khung ve ve a, Jeje hnu lama India team-a Mizo langsar ber a ni chho zel.
Mizo winger pawh Iraq khelh hmain a tawngchhuak a, “Tun dinhmunah team boruak a tha takzet a, tunhnai thla reilote liamta chhung khan hlawhtlinna duhawm tak tak changin, kha boruak bawk kha kan chhunzawm leh theih ka beisei.
“Nimahsela, kan tum tur (Iraq) hi kan tan fiahna tak tak a la ni leih leih chauh a, Asia khawmualpuia team tha berte zinga mi away-ah lehnghal hmachhawn tur kan ni,” tiin nizana Arab team an hmachhawn boruak a sawi.
Thailand leh Lebanon erawh India tan hlauhawm an tlin hmel loh a; Thailand bik hi Abu Dhabi khawpuia 2019 AFC Asian Cup nghah a nih tum khan India hian 4-1 zeta sawpin, 2019 King’s Cup-ah sikhat faiin an lo hneh tawh bawk.
Lebanon pawh hi India nena inhmachhawn fo tawh bawk niin, Intercontinental Cup leh SAFF Championship-ah khan thla khat lek chhungin vawithum an intawng hman a, tah chuan India vawikhat chakin, vawi-hnih an inhnehtawk a, tah chuan SAFF Championship semi-final penalty shootout-a India chak a tel nghe nghe.
Tun hi India-in King’s Cup a khelh vawilina niin, kum 2019 hnu lama a vawikhatna a ni nghal a; khami khan khan Blue Tigers hian semi-final thleng mah se Curacao hneh loh vangin final an lut zo lo a, a thlengtu Thailand nen pathumna an inchuh hnuah 1-0 hnehna nen bronze medal an rawn hawn.
1977 King’s Cup-ah khan India hian South Korea, Singapore, leh Indonesia hnehin bronze a lo hawn tawh bawk a; kum 1981 khan group stage a pel zo lo.
He tournament kal lai an khelh zawh hnuah Stimac-a squad zinga tlemte hi Hangzhou Asian Games lamah an inlan zui leh ang.
-- Advertisement --
King’s Cup-a Indian squad
Goalkeepers: Gurpreet Singh Sandhu, Gurmeet Singh.
Defenders: Asish Rai, Nikhil Poojary, Sandesh Jhingan, Anwar Ali, Mehtab Singh, Lalchungnunga, Akash Mishra.
Midfielders: Jeakson Singh Thounaojam, Suresh Singh Wangjam, Brandon Fernandes, Sahal Abdul Samad, Anirudh Thapa, Rohit Kumar, Ashique Kuruniyan, Naorem Mahesh Singh, Lallianzuala Chhangte.
Forwards: Manvir Singh, Rahim Ali, Rahul KP.
Head coach: Igor Stimac.