Chhiarpui atan inhawng turin mipui ngen

Chhiarpui atan inhawng turin mipui ngen
2027 Chhiarpui neih mekah vawiin – April 16 atang hian thawktuten inah kalchilhin chenna in leh mimal/chhungkua chhinchhiah ngai an chhinchhiah tan dawn a, tha taka lo thawhpui turin mipui ngen an ni.
Sawrkar laipui Ministry of Information & Broadcasting hnuaia Press Information Bureau bultumin Chhiarpui 2027 buaipuitu Directorate of Census Operations leh state nodal department – General Administration Department hotute chuan thuthar thehdarhtute kaltlangin mipui hnenah thu an chah a. Chhiarpui neih mekah thawktute tha taka thawhpui tur leh chhiarpui titute ID card enfiah hmasa thin turin an chah.
Directorate of Census Operation director Vinod P Kavle chuan, chhiarpuiah online-a mahnia inziahluhna hun hawn a ni a. Vawiin – April 16 atangin chhiarpui atana Houselisting & Housing (HLO) kalpui tan a ni dawn tih a sawi. HLO kalpui turah chhiarpui buaipuitute tha taka thawhpui tura mipui chahin, chhiarpui atana zawhna an neih pawh tha taka chhang turin a ngen tih a sawi a ni. HLO hi May 15 thleng neih tur a ni.
Mimal chanchin (data) lakkhawm tawh chu khawiah mah tih darh a ni dawn lo tih a sawi bawk.
Census hotute sawi danin, chhiarpuiah hian a thawh hnihnaah mihring chhiar (population enumeration) tur a ni a, nakkum February atanga kalpui tur a ni. Mihring chhiarnaah hian ram chhunga khawsa mi tupawh, India mi leh sa ni lo pawh chhiar tel vek an ni dawn tih an sawi a. Mizoram mi leh sa, state danga hna thawk emaw zirna avang emawa awm chu an awmna state-ah theuh chhiar tel an ni dawn tih an sawi bawk.
Census.gov.in ah mahni a inziahluh – self enumeration theih a ni a. Tun thlengin mi 10294 an inziaklut tawh a ni.