MCC bawhchhiatna nia an ngaih MNF Legal Board-in an complaint

Aizawl Municipal Corpoation inthlan turah MNF Legal Board chuan District Election Officer Aizawl hnenah model code of conduct (MCC) bawhchhiat a nih chungchangah Nilaini khan complaint an thehlut.
Complaint hi MNF Legal Board joint secretary, advocate Lalbiakkima hmingin thehluh a ni a. MCC No. II leh VIII hnuaia khuahkhirhna dan awm chu palzut a ni, tiin, ‘He complaint hian a tum chu, Aizawl hmasawnna atana hmalakna daltu nilo in, dan hnuaiah dan ang takin hmasawnna hi kal se kan duh a. Inthlan denchhena dik lo taka hma lak hi do a ngai a ni tih rilru pua thehluh a ni,’ an ti.
State Election Commission-in dik leh fel taka ruling leh opposition party-ten inthlan felfai leh thianghlim kan neih theihnan inkaihruaina dan a siam chung pawh a, sawrkar laiin sawrkarna hmanruaa hmanga an party candidate-ten vote an hmuh theihna tura sawrkar hmalakna, model code of conduct-in a phuar rih pawh pawisa loa, campaign-na atana an hmang fo chu MCC dan kalh a nihna ang leh level-ah pawh party tinin ‘playing field’ inang an neih theihnan he complaint hi an thehlut tih a sawi bawk.
MNF Legal Board-in complaint a thehluh chu – Aizawl East-II ZPM Block Media Cell thuchhuahah, 2026 April 6 khan minister Pu B Lalchhanzova chuan Armed Veng South Cultural Club senso a tumsak thu tarlan a ni. Aizawl East-II huamchhungah tho Chhinga Veng Junction chu 2026 April 11-ah siam a ni.
2026 March 26-ah AMC Ward No. XVIII ZPM candidate K Lalrodinga chuan Venghnuai Branch MUP chu pawisa pe in Sorazo a sem a. Minister C Lalsawivunga chuan 2026 April 11 khan Republic Vengthlangah transformer dah a tiam thu a sawi a. MP Richard Vanlalhmangaiha chuan 2026 April 11 khan Republic Vengthlang leh Upper Republic chu Mahindra Bolero pik up a pe, tithe a ni.