Chhiatna thlen vangin hmasawnna hnathawh a chawlh phah chuang lo – Lalthansanga

Mizoram hmun hrang hrangah chhiatna thleng mah se, sawrkarin hmasawnna hnathawh chawlh phah nan hmang loin department tinin an chanpual theuhah theihtawp an chhuah tih minister Lalthansanga chuan a sawi.
Aizawl East I bialtu MLA ni bawk Lalthansanga hian Ningani khan a bial Zemabawk North huamchhung hmun hrang hranga chhiatna thlengte a hmunah a tlawh a. Tun tum chhiat tawhna chu a namai lo hle a, an bial chhungah pawh nunna chan hial an awm chu a pawi a ti hle tih a sawi.
Sawrkarin chhiat tawk chhungkua leh khawtlang tan theihtawp a chhuah a, sawrkar leh a department ang pawhin vawi tam an thukhawm tawh a. A theih anga chakin chhawmdawlna an inpe chhuak reng a, duhthusam ang diak diak erawhin hma a lak theih loh avangin mipui hriatthiamna an dil tih a sawi a ni.
Hmun hrang hranga chhiat tawhna avangin hmasawnna hnathawh chawlh ringawt a rem loa, department hrang hrangten mahni hna chanpual theuhah ram tan theihtawp an chhuah reng tih minister hian a sawi a. A department chan pawh an awm mai mai loa, sangha thianghlim ei tur hnianghnar taka kan neih theih nan Fisheries department-in hma a la mek a; Sericulture chu ram sum leh pai dinhmun chawikang dawrh thei leh eizawnna ngelnghet din theihna a ni a; chutiang bawkin department dang pawhin anmahni line theuhah thahnemngai takin hna an thawk tih a sawi.
Zemabawk North-a Sericulture department hmun hma chu Sericulture minister hian a tlawh nghal a ni.