Chhiatna thleng thei pumpelhna atan mipui zawm ngei tur tichhuak

Chhiatna thleng thei pumpelhna
atan mipui zawm ngei tur tichhuak
District Disaster Management Authority (DDMA) Aizawl chairman, district magistrate Er. Lalhriatpuia chuan chhiatna thlen thei thil pumpelh leh invenlawkna atan Aizawl district-a cheng mipui zawm ngei ngei tur dan tlawhchhan hmangin a tichhuak.
Aizawl Municipal huamchhunga in, office, playground, vantlang zun in sa tur chuan Site Development & Slope Modification (SD&SM) hnuaiah AMC-ah phalna la in, a hmunhma 45 degree aia awihah chuan slope stability analysis report nei ngei turin a ti.
AMC atanga building permit nei zawng zawngten AMC-a SD&SM Board-in excavation plan phalna an pek ang chauha lei lai turin a ti a; an geologist rawihin uluk takin a enpui tur a ni, a ti.
Lung hal ngai a nih chuan Directorate of Geology & Mining-a mithiamte ruaiin anmahni enpuinaa hna thawh tur a ni, tiin, leilung thawl/ ngheh lohna hmunah chuan khawl lian leh nghawr na thei chi hman loh tur, a ti.
AMC-in a pek building permit neiten tui khawlna tur tha tak siam nghal turin a ti a. Hei hi a remchang lo a nih pawhin tui luankawra luanglut tura ruahmanna siam turin a ti.
Aizawla in neiten tuichhe paihna mumal tak siamin, vantlang tui luankawr a pawh ngei tur a ni, a ti a. Kawrpui hlata in neituten an tuichhe paihna kawrpuia inchhung thei turin Local Level Disaster Management Committee nen hma la in, AMC Building Regulation Section-37 in a phalsak angin an thenawmte ram paltlang pawha tui luan kawng siam phalsak tur a ni, a ti. Tui luankawr hi uluk taka siamin, lei chhunga tui put awm lo tura siam turin a ti bawk.
Inthenawm hnaivai, tui luankawr intawmten ruahtui luanna tur tui luankawr ruahtui dawng vek thei leh tha tawk tak siam turin a ti.
Local Level Disaster Management Committee tinin mahni vengchhunga lungrem a him tawk leh tawk loh enfiah a. Him tawk loa hriat chu a ranglamin Committee-in DDMA Aizawl chairman hnena report turin a ti.
Vawk leh ar vulh phalna nei ten an vawk in/ar in chhuat phahah RCC hmanga tray siam turin a ti a. A thli hi tui luankawra paih/ luanluh tir ngei turin a ti.
Aizawl chhung leh daia stone quarry neiten Directorate of G&M atangin mining/ quarring plan nei a, plan anga hma la turin a ti. A tlem thei ang ber lung hal a, nghawr na lo thei ang leh a bulhnai leilung ti che tlem thei tur berin, engineer enpuinaa scientific blasting hmang turin a ti. Shotfirer license neiloin tumah lung hal phal a ni lo tih a sawi a ni.
Quarry-a lung hal dawnin, a halna tur kua feet 6-a thuk, 8mm aia zau loa siam turin a ti a. Vawikhatah hmun 5 aia tam lo hal tur leh, quarry neituten mamawh chin chauh lung la turin a ti a; vawikhatah hmun zau tak hal lo turin a ti.
Heng thuchhuah zawm lo chu DM Act 2005 Section 51 (b) hmangin hrem theih an ni tih a sawi a ni.