Chhiatna thlenna hmun tlawh

Thli leh rial thawkin Lawngtlai district Hmawngbu leh Tuithumhnar khuaa chenna in a tihchhiat chu Inrinni khan district bawrhsap Cheemala Siva Gopal Reddy chuan a hmunah a enfiah.
Hriat theih chinah May 2-a thli leh rialin chenna in a tihchhiat hi Lawngtlai district-ah 209 awmin, chu’ng zinga 62 chu raltlante chenna in/ buk a ni a. Khaw malkhaia in chhia tamna ber chu Tuithumhnar niin, chenna in 76 (raltlan in 18 a tel) a chhia a. Chamdur P-I ah in 25, Vawmbuk-II ah in 24, Vathuampuiah raltlan chenna in 21, Hmawngbu-ah in 12, Lunghaukaah in 10 leh khaw dang pariatah belhkhawmin in 41 a chhia a ni.
Bawrhsap hi village council leh tlawmngai pawl hruaituten lo dawngsawngin thli leh rialin chenna in a tihchhiatte chu a tlawh a; thawmthat dan tur ruahmanna an sawi ho. Rialin an in chung rangva a den chhiatte hnenah a nih tur anga tanpuina pek theih hmaa an lo khuh lailawk nan silpauline a hlan a ni.