Chhum zingin thlawhna leh rel vaivak tibuai

Zirtawpni tuk khan Delhi-National Capital Region (NCR) chu chhum leivakin nasa takin a bawh a, khaw hmuh theih chin chu ‘zero’ a nih avangin thlawhna thlawk tur 150 chuang leh rel chhuak tur 26 tihkhawtlai a ni.
Thlawhnate hi chawhrualin minute 41 theuh tihkhawtlai niin aviation website FlightRadar24 chuan a tar lang.
Delhi International Airport Limited (DIAL) pawhin an social media-ah Zirtawpni tuk khan chhum leivak zing nasa lutuk avangin thlawk chhuak tur ‘a nghawng’ tih an tar lang a. CAT III-compliant flight-te erawh an tumin an chhuak thei niin an sawi bawk.
India Meteorological Department (IMD) chuan India hmar lama Punjab, Haryana leh Rajasthan te chu chhum leivakin a tuam dawn tih a lo sawi lawk tawh.
Chawlhkar liam ta lamah pawh khan hmar lamah hian thlawhna leh rel chhuak tur thahnem tak tihkhawtlai leh zin thulhtir an lo ni tawh bawk.
Central Pollution Control Board website chuan ram khawpui berah hian Zirtawpni zingah khan air quality index (AQI) chu 408 a ni a, ‘tha lo tak’ huang atangin ‘hlauhawm’ huangah a kai tih an tar lang.
AQI hi zero leh 50 inkar chu ‘tha’ a ni a, 51 leh 100 ‘pangngai’, 101 leh 200 inkar ‘la tha pangngai’, 201 leh 300 ‘tha lo’, 301 leh 400 inkar ‘tha lo tak’ leh 401 leh 500 ‘hlauhawm’ tia then a ni.
IMD chuan Delhi-ah hian a vawh lai berin 9.6°C a ni tih a tar lang a. Zirtawpni khan a vawh laiin 6 leh a lum lai berin 20°C a ni.
Boruak bawlhhlawh thar leh avang hian sorkar laipui hnuaia Commission for Air Quality Management (CAQM) chuan Delhi-NCR huam chhungah hian Ningani khan Graded Response Action Plan (GRAP) hnuaia inkhuahkhirhna stage 3 a kalpui leh tan bawk.
CAQM hi Delhi-NCR huam chhunga boruak dinhmun thlira chhe lehzual a awm lohna tura inkhuahkhirhna kalpui dan tur ruahmanna siamtu a ni.
GRAP Stage 3 hi rei tak hman niin Pathianni khan phelh chauh a ni a, hman a nih chhung hian tul lova in sak ang chi zawng zawng khap a ni a. Zirna inte pawh hybrid mode an tiha kalpui niin nu leh paten an duh zawk a nih chuan online-a zirtir an thlak thei.
Stage 3 hnuaiah BS-III petrol leh BS-IV diesel car (ke li nei) chu Delhi leh a bulhnai NCR district-ah an tlan khap an ni a, pianphunga rualbanlo ngaihhnathiam an ni a. Bungraw phur chi lirthei laihawl, BS-IV chin pawh ni tin mamawh phur an nih loh chuan tlan khap an ni bawk.