Delhi sikul tam tak bomb-a tih\haihtu man

Chawlhkar eng emaw zat Delhi-a sikul thahnem tak bomb awm anga tihthaihna avanga an buai hnuah police chuan kumtlinglo pakhat, he thila inhnamhnawiha an exam theih loh nana titu nia hriat chu an chhui chhuak.
Pawl 12 zirlai hi bomb-a khawpui pum mai ni eng emaw zat a tihthaih ngei tih an chhui chhuah hnuah an hreng zui nghal.
Bomb-a mi tihthaihna hi email hmangin vawi ruk vek a thawn a, a luhna sikul tih loh sikul hrang hrang a thawn a. Amah rinhlelh a nih loh nan vawi khat thawnah sikul tam tak a tag zel a, vawi khat phei chu a rualin sikul 23 zet a thawn.
Thuneitute chuan he naupang hian sikula exam a peih lo va, bomb hmanga tihthaih hian exam tura ruahmanna awmsa tikhaihlakin an thulh phah a beisei niin an sawi.
Chawlhkar eng emaw zat liam ta kha bomb awm anga tihthaihna avang hian thuneitute an buai tawh a, chief minister hlui, Arvind Kejriwal-a pawhin Delhi hian hetianga dan leh thupek kenkawhna chhia hian an awm ngai lo niin a sawi hial.
Tihthaihna an dawn hian zirlaite chu hawtir leh vek an ni thin a, bomb squad leh ui fingte koh an ni thin a. A hnuah engmah rinhlelhawm hmuh a awm ngai chuang lo va; mahse, sikul hung chhung dap leh endik chhung a rei a, zirlai tan inrinlawk lohva chawlh a awm theih phah thin.
Thla hmasa pawh khan Paschim Vihar-a DPS RK Puram leh GD Goenka School telin sikul 40 chuangin email atangin bomb hmanga vauna hi an dawng a. Email-ah hian sikul building-ah bomb tenau kam niin a sut turin $30,000 phut a ni.
Bomb hmanga intihthaihna hian politics-a inbeihna pawh hring chhuakin Chief Minister Atishi chuan sorkar laipuia BJP kaihhruai sorkar chu dan leh thupek kenkawhah hlawhchhamah a puh a. Ram khawpui bera police-te hi Delhi sorkar hnuaia awm ni lovin union home ministry hnuaia awm a ni.
Hetiang tihthaihna a awm fo avang hian city police chuan zirtirtu leh sikula thawk dangte chu hetiang an tawna an chet lak dan tur an zirtir hial a. Education department nen seminar vawi eng emaw zat an buatsaih a ni.
Hetih hun lai vel tho hian airline eng emaw zatin hetiang tihthaihna hi an dawng a, zin veivahna a tiralkhelin dan kengkawhtute pawh an buai phah hle a. Hmanhmawh taka thlawhna tumtir te, thlawh chhuah hun tihkhawtlai te leh tul lova tuialhthei sen teuh teuhna a thlen nasa hle.
Nikum khan Delhi Police chuan hna nei lo tlangval kum 25 mi chu bomb-a mi tihthaih chhuinaah an man a; kum 17 mi pawh a thian hnenah hetiang mail hi thawn tura a tih avangin Mumbai-ah man a ni bawk.