Chhun pachangah ruihhlo leh a sulhnu
Mizoramah ruihhlo a hluar tih hi thu thar a ni lo a, chik vak lo tan pawh hai rual a ni lo ang. Aizawl khawpuiah phei chuan ruihhlo a hluar a ni tih hi kal pah pawhin a hriat theih.
Aizawl khawpuiah chhun pachangah pawh ruihhlo leh a sulhnu hi a hmuh theih a, Aizawl hmun lun laite hi ruihhlo zawrhna hmun a lo ni thin! Chhun pachangah zalen taka zuar an awm a, ngampa taka lei an awm, chhun enga inchiu mawlh mawlh an awm bawk.
Vanapa Hall bul velah ruihhlo lei duh leh a zuar an bawrkhawm thin a, inchiu mawlh mawlh an awm thin bawk. Heng lai vela kaltlang pawh a inthlahrunawm rum rum thei a, ‘Kan lo kal lawk aw,’ tia hawihhawm chhuah te pawh an awm thin.
Vanapa Hall bul vel hi ruihhlo lei mai tur a awmna hmun a ni a, he hmuna kal thinte chuan tam thama lei tur ni lote kalkhawmna a nih thu an sawi.
He hmuna kalte hian an lei a ni mai lo a, an rui nghal thin; an vai chuan an rui nghal kher lo mai thei a, mahse engemaw zat chuan an rui nghal thin. An thu bial a, zalen takin an khawih mai. Kawngkalte tana hmuh hrehawm khawp a ni thin.
Aizawl khawpuia hmun lun lai, veng hrang hrangah ruihhlo hi an zuar a, Aizawl Lei velah pawh an zalen. Lei hnuai vela riak te pawh an awm thin nia sawi a ni.
Mizoram Excise & Narcotics department hotute chuan Aizawlah hian khaw dang atanga ruihhlo vanga kal an thahnem tih an sawi a, an thlen ina riak lovin an tei kual zui mai thin tih an sawi.
Tunlaiin heroin a hluar a, tic tac bur khat hi khawlaia an tehna tlanglawn niin, tic tac khat chu Rs 2000 vel a ni an ti. A man hi a che reng an ti a, nikum khan Rs 1700-1800 nih lai te a nei an ti a, tunlai hian lei tur tam mah se a man hi a hma aiin a sang an ti. Tic Tac khatah hian ‘chhin sen’ ruk a awm leh a, ni khata ‘chhin sen’ 10 chuang mamawh te pawh an awm a ni awm e.
“A man a to a, kan lo duh hnem bawk a, chuvangin thil ruk nen hian a inzawm lo thei lo,” ruihhlo ti thin pakhat chuan a ti a, dose a inan loh thu a sawi rualin, a dose hniam deuh tan pawh a hautak thu a sawi.
No 4 ti thinte hian hrehawm an tih thu an sawi a, nghei har an tih thu te, an awm dan hi an nin ve tho thu te an sawi.