Catholic Kohhran-in centenary hmang

Catholic Kohhran-in centenary hmang
Mizorama Catholic Kohhran luh kum 100-na, Centenary Jubilee chu hman tan a ni a. Kumin chhung zawngin hman a ni anga, kumtawpah a kharna siam a ni ang. Centenary thupui atan hian “Catholic rinna nunpui la, puangchhuak rawh” tih hman a ni.
Centenary Jubilee hi Inrinni khan Christ the King Cathedral Kulikawn-ah Bishop of Aizawl Most. Rev. Stephen Rotluanga, CSC chuan a hawng a. A hawnnaah hian centenary dar vawi 100 vuak niin, sakhaw rawngbawltu leh kohhran mi thlanchhuahten an vua. Bishop hian Jubilee kawngkapui a hawng a, hei hian Pathian zahngaihna luangliam a entir. Catholic biak in tina tar tur Jubilee logo tlangzarhin, jubilee kum chhung zawnga chhit tur ‘Jubilee bati’ a chhikai. Diocese Zaipawl-in Jubilee hlapui an rem a, Cathedral zaipawlpuiin hla an rem bawk a; Mass thianghlim inthawina in centenary hawnna hi khar a ni.
Mizoramah Catholic Kohhran hi 1925 February 1-ah mi panga- Lianchheua, Thangphunga, Lenga, Chalchhuna leh Lalbana, Aizawl Tlangnuam mi vekten an din a. Heng mite hian Catholic Kohhran chanchin an chhiar atanga Catholic rinna vuan ta an ni. 1927 February-ah biak in hmasa ber sa zoin, ‘Christ the King Church Kulikawn’ tih a ni a. Kum 1947 atangin puithiamte pawh Mizoramah an thu nghet a ni. Kum 1996 atangin Aizawlah Bishop-in a thutchilh a, Diocese of Aizawl tih a ni. Catholic Kohhran hian Mizoramah zirna, khawtlang nun leh hmasawnna kawng hrang hrangah nasa takin hma a la a ni.
Centenary pual hian Isua’n a zirtirte tawngtaina a zirtirna hmun nia sawi, Jerusalem-a Pater Noster Church-ah 2024 December 5 khan Mizo tawng ngeiin Lalpa Tawngtaina tar a lo ni tawh a. Hemi hmunah hian khawvel tawng hrang hrang 150 chuangin Lalpa tawngtaina hi tar chhuah tawh a ni.
Centenary lawmna hi kawng hrang hrangin kumin chhung hian hman chhunzawm zel a ni anga, kumtawpah a kharna hun St. Lawrence Church Ramthar Veng Aizawlah neih tura ruahman a ni.