Chhung tin agenda- ruihhlo do

Deputy chief minister chuan, chhungkaw tinin agenda-ah ‘ruihhlo do’ dah theuh a tul tiin, khawvel huapa ruihhlo do ni ‘International Day Against Drug Abuse and Illicit Trafficking’ khan a sawi a.
END report-a a lan danin kum 20 liam ta chhung khan Mizo thalai ruihhlo vanga thi mi 1,775 an awm a. Chumi awmzia chu, chawhrualin kum tin ruihhlo vanga thi mi 88.75 awm ang an ni a; thla tin ruihhlo vanga thi 7 an awm tihna a ni bawk a, chumi awmzia chu ni 4 danah ruihhlo vanga thi pakhat awm zel ang a ni.
Mihring kan lo pian chhuah phat atanga zirna hmun hmasa ber leh pawimawh ber chu ‘chhungkua hi a ni. Thuhriltu ropui tak DL Moody chuan, ‘mite hian ka nu ang hi nu nei theuh sela chuan, khawvelah hian jail a awm a tul lovang, tiin a lo sawi hial a. Chhungkua tih leh Nu tih hi kaih then hleih theih pawh a ni awm lo e.
Chuti a nih chuan, Mizoramah ruihhlo ngai an tam em em chhan hi, chhungkua/nu tha lo kan tam tihna a ni thei ang em? tih hi zawhna pawimawh tak a ni awm e. He zawhna chhang dik tur chuan, zirchianna, survey leh research tel lova rinthua chhan dik mai theih pawh a ni lo maithei; mahse, chhungkua hian dinhmun pawimawh ber chu a luah ngei ang tih a rinawm.
Tuna Mizorama ruihhlo ngai tam takte hi chu chhungkua atanga zirtirna tha tak dawng tho si, mahse pawn lama an thian kawpte dik loh vanga humsual lo dai palh an nih a rinawm a. Chutih laiin, chhungkua atanga zirtirna tha dawng em em hran lote hi ruihhlo leh chin thalo dang ching an ni vek kher lo tih a lang bawk a, heng mite hi zirna sikul chhung leh lehkhabu an chhiar tamna atanga kawng dik zawh tura inthunun thei an nih a rinawm.
Chuti a nih chuan, chhungkua hi a pawimawh hmasa ber a, a dawtah chuan zirna sikul a tih theih awm e. Chhungkua atanga inenkawlna dik leh, zirna sikul lama tuihnihna inkawp chuan nasa takin hna a thawk sawt zawk ang tih a rinawm.
Chhungkua chu a pawimawh hmasa, mahse tun kan dinhmunah chuan chhungkua, sawrkar (edn dept), kohhran, NGO leh mimal tinte hian ruihhlo do hi agenda lian bera kan neih loh chuan, thildangah hma sawn thin mah ila, thalaite ruihhlo vanga thi an tam reng si chuan, hmasawnna chen tur hi kan awm lo thuai mai ang tih a hlauhawm a ni.