Chhungkaw 2733-in oil palm huan nei Mizoramah oil palm chi thar ching tan

Chhungkaw 2733-in oil palm huan nei
Mizoramah oil palm chi thar ching tan
Mizoram district 7-a chhungkaw 2733-in oil palm huan an nei a, hetihlai hian India sawrkar hmalakna kal zelah Mizoramah pawh oil palm chi thar chin tan a ni.
Larsap Hari Kambhampati chuan Thawhlehni khan Raj Bhavan-ah Agriculture department hotute leh an thawhpui company – Godrej Agrovet Ltd leh Patanjali Foods Ltd hotute a kawm a. Hriak atana sawr theih thlai chi, be chi hrang hrang (pulses) leh oil palm tharchhuah kawnga Mizoram dinhmun powerpoint hmanga thlir ho a ni a. He hmalakna huanga tan lak chhunzawm dan tur leh harsatna chinfel dan turte sawi a ni.
Heta report a nih danin, oil palm hi Mizoramah kum 2005- 2006 atang khan The Mizoram Oil Palm (Regulation of Production & Processing) Act 2004 peihfel hnuah chin tan a ni a. A tira chhut dan chuan Mizoramah oil palm chin theihna hmun hectare 66791 a awm a, hei hi a state pum atanga chhutin zaa 3.16 vel a ni. Hmalakna kalpui tak tak a nih hnuah oil palm hi Ha. 26730 a zauah chin a ni a. Chhan hrang hrang vangin oil palm ching an tlem ta deuh a, tunhnaia zirchiannaah Ha. 3398 a zauah chiah oil palm hi chin a ni tawh. District 7-ah chin a ni a, khaw 193-ah kuthnathawktu chhungkua 2733 ten oil palm huan an enkawl a ni.
Oil palm rah rate hi international market milin tih danglam a ni thin a. Formula Price of NMEO-OP chu November 2022 khan hman tan niin, hemi mila oil palm rah (FFB) hralhna rate chu – November 2022 ah kg ah Rs. 10.63, December 2022 ah kg khat Rs. 10.817, January 2023 ah kg khat Rs. 10.38, February-ah kg ah Rs. 10.28 ‘fixed’ a ni.
Oil palm chin chungchangah thu dik tawk lo vawrhdarh a ni tih department hotute chuan an sawi a. Mi tam takin oil palm chin an bansan phah niin an sawi. Hemi zirchiang tur hian mithiamte ruat an ni a, 2022 March 14 khan “Study Team for Pilot Research & Study on Oil Palm cultivation and its effect on the environment” tih chu din a ni.
Oil palm chi thar chin tum a ni a, Mamit district West Serzawlah Oil Palm Seed Garden kalpui mek a ni. He huan atang hian kum 2024- 2025 chhoah oil palm chi tharchhuah tan beisei a ni a. Oil palm chi tharchhuahna hi India hmarchhak bialah chuan Mizoramah chiah a la awm. He huana oil palm chi hralh atang hian kumtin sum tam tham tak lakluh theih beisei a ni tih an sawi.
Report pek danin hriak atana sawr chi thlai chi – antam, bekang, chhawhchhi leh a dangte chu hectare 3024 a zauah chin mek a ni a, metric ton 3158 vel tharchhuah thin a ni. Agrilculture department hotute sawi danin, a hlawm lian deuha hriak chang thei thlai chi lakkhawm a nih theihna’n oilseeds chingtute intelkhawmna pawl din a ni tawh a, awmze nei zawkin hma lakpui theih an nih beisei a ni. SEDP hmalakna in nikumah bekang chi semchhuah a ni a; heng hi thar a nih hunah oilseed tharchhuah zat pawh a pun beisei a ni.
Oil palm sawrna hmun hi Kolasib district Bukvanneiah Godrej Agrovet Ltd-in a enkawl mek a. Kum 2014 atang khan chawl loin an la her a ni. Patanjali Foods Ltd aiawhtu chuan vawiin – March 15 hian Lawngtlai district-ah oil palm herna tur bun turin inremna thuthlung ziah a ni dawn tih a sawi a. Ruahman ang chuan oil palm herna hi Liapha hmun, Rualkual khuaah bun a ni dawn.
Larsap chuan National Edible Oil Mission-Oil Palm (NMEO-OP) kalpui mekah Prime minister-in state tinte hriak ei chi siam leh tharchhuah, pulses tharchhuah leh oil palm tharchhuah kawngah tan la zual tura a hriattir tawh thu a sawi a. India ramin kum khat chhunga hriak ei chi a mamawh zinga zaa 60 chu Indonesia leh Malaysia atangin sum tam tak sengin a lei thin bakah pulses – dal, bekang, chana leh a dangte pawh ramchhunga tharchhuah kan khamkhawp lo hle tih sawiin, “Intodelh tura hmachhawp pawimawh takah hian Mizoram pawhin tih theih a nei a. Hemi huanga hmalaknaah hian tan lak nasat a ngai. Hma kan sawn phawt chuan state sum thawhchhuah a pun bakah kuthnathawktuten hlawkna an tel dawn a ni,” a ti.