Chhungkaw 300 dawnin nuai 3 dawng tawh

SEDP hnuaiah chhungkaw 300 dawnin cheng nuai 3 an dawng tling tawh tih MNF Thalai vice president Zodinpuia chuan a sawi.
MNF Thalai Hqrs. chuan Aizawl khawpui chhunga MNF Thalai Block hrang hrang a tlawhchhuak mek a. Heng intlawhnaah hian MNF Thalai vice president chuan MNF chu thalaite din leh martar-te thisenin a bual a ni, tiin, Mizo nationalism lungphum hmuchhuak a, vawnghim rengtu a nih avangin kan ram leh hnam himna MNF chuan a dah pawimawh hmasa ber a, political party dangte anga sawrkarna chan ringawt chu MNF dinchhan a ni lo, tiin a sawi.
Kuthnathawktuten SEDP cheng nuai 3 an dawn tlin ngei theihna’n sawrkarin instalment hrang hrangin tanpuina sem chhoh zel a tum tih a sawi a. Tunah hian chhungkaw 120000 hnenah SEDP tanpuina a thleng kim dawn tawh a, SEDP pilot project atangin chhungkaw 300 dawnin nuai 3 an dawngtling tawh tih a sawi a ni.
Hrileng vanga kum hnih chuang sawrkarin hna a thawk mumal theilo chungin, MNF sawrkar chuan thalai leh zirlaite hmasawnna turin nasa takin ke a pen a, zirna leh thalai infiammite tan MNF sawrkarin bungthar min kaipui hial tawh tih Zodinpuia hian a sawi a. Sawrkar hmasa lama mipui sawisel ber kawngpui chhia chu MNF sawrkar hnuaiah nasa taka thlakdanglamin a awm a, kawlphetha bakah eirawngbawlna gas leh buhfai kan hnianghnar hle tih sawiin, India ram state dangin an kalpui theih loh ni 100-ah ni 100 inhlawhna pawh Mizoram ah chuan kalpui theih bik a ni, a ti.