CM atana Lalduhoma pawm lo tan ZPM-a awm a rem lo – K Sapdanga

Chief minister atana Pu Lalduhoma pawm lo tan ZPM party-a awm a remchang lo tih ZPM working president K Sapdanga chuan a sawi.
Ningania ZPM Aizawl North-II Block Extended Meeting neih a hmanpuinaah K Sapdanga chuan tunlaiin MNF leh Congress in Pu Lalduhoma nen inngeih loh tir an tum thar leh nasa hle tih a sawi a. An lungrualna tichhe tur zawnga an beihna chu an party chuan a nghin phah tur a ni lo, tiin, “Leader atana Pu Duha pawm lo leh chief minister atana Pu Duha pawm lo tan ZPM-a awm a remchang lo. ZPM hi ka chhuahsan a nih ngawt loh chuan Pu Duha leadership hi lungsi takin ka pawm a, Val Upa Council rorelnaah hian ka lungawi a ni,” a ti.
Mizoramah ZPM thli a tleh mek a. Khawi atanga lo tleh tan nge pawh hriat lohin, thingtlang, khawpui leh sawrkar hnathawk zingah pawh a tleh mek tih ZPM working president hian a sawi. “A chhan nia lang chu, sawrkar tha, kalphung thar mipui sawrkar duhna a lian hle tihna a ni. Nu ho zingah a tleh a, thlalai zingah na takin a tleh mek zel a. Thli neitu hi politics neitu a nih tlat avangin a duhzawngin campaign zel ang u,” a ti.
He hun hmanpuitu dang Aizawl North-II bialtu MLA Dr Vanlalthlana chuan ZPM chu party dangin an puhna, midang tih beidawna chu an beidawnna chu advantage-a lak tum angin an puh thin, nia sawiin, “Keini hi beidawnthlak tak thil a thlen lai pawha beiseina nei tlattu party kan ni a. Kan tu leh fate leh kan thlah kal zel tur tan thil tha zawk hnutchhiah turin beiseina kan nei a, chu beiseina tihlawhtling tur chuan nasa takin kan bei mek a ni,” a ti.