Chief secretary-in Champhai a tlawh

Chief secretary-in Champhai a tlawh
Zan hnih riaka Champhai district tlawhtu chief secretary Dr Renu Sharma chuan Zirtawpni khan Champhaia sawrkar department hotute kawmin department hnuaia scheme hrang hrang hnuaia hmalakna, hmachhawp leh tul dangte a sawipui.
Chief secretary chuan Champhai district chu ramri depa awm a nih angin, ruihhlo leh dan loa ramri kaltlanga thil tih dapchhuah leh man kawngah theihtawp chhuah a tul tih a sawi a. Ramri kaltlanga ruihhlo tawlh chuan Mizoram mai nilo India ram hmundang thlenga a nghawng tel avangin sawrkar laipui pawhin a ngaihven hle, tiin, line department hrang hrangte chu NGO, kohhran leh khawtlang nen tangruala ruihhlo do leh hemi chungchang inzirtirna tam zawk kalpui turin a chah.
Champhai district bawrhsap James Lalrinchhana chuan district chanchin, centrally sponsored scheme kalpui meka hmasawnna, hmalakna kal mek leh hmachhawpte powerpoint presentation hmangin a sawifiah a. SP Lalrinpuia Varte chuan dan leh thupek kenkawh kawnga district dinhmun a sawi.
Report danin, electoral roll thar berah Champhai district-a Assembly bial thum awmah voter 56362 leh polling station 84 a awm a. Department hrang hrang head of office 67 an awm. May 31 thleng khan Champhai district-ah Myanmar atanga raltlan 12209 an awm a, refugee camp 34 awmin, mi 9488 te chhinchhiah fel an ni tawh a, mi 9488 temporary ID pek an ni a, 263 tan buaipui mek a ni. Raltlante pualin India dan inhrilhhriatna tum 12 neih a ni tawh a, Manipur atanga raltlan 209 an awm bawk.
Champhai district-in Indo-Myanmar border kilometre 160-a thui a nei a. Border pillar pathum awmin dan loa thiltite tana awlsam taka ramri kan theihna, vulnerable crossing point 23 vel a awm. Champhai District Executive Force (DEF) hnuaiah Sub-division 1, Police Station 3, Beat Post 1, Checkgate 3 leh Beat Areas 15 a awm bakah 2 Assam Rifles & 42 Assam Rifles te khaw 7 ah an an awm bawk. District chhunga khua 48 te Free Movement Regime (FMR) huamchhungah an awm a; Border Crossing Agreement 2018 angin border pass pe chhuak tura ruahmanna awm chu thenawm ram buai leh rokhawlhna dangte avangin a taka kalpui a la ni rih lo.
Thutkhawm zawh hian chief secretary chuan District Hospital a tlawh a. Champhai Vengthlang mi Vanlalthafamkima’n hnawm paih mai tur atanga leitha siamna, a in bula a siam chu a enfiah a. Amrit Sarovar kaltlanga Phaizau tuikhuah thawmthat leh Champhai Winery Tlangsam a tlawh bawk a, thawktute nen an inkawm a ni.