Chin hriat loha kum 2 awm tawh ruang hmu

Champhai mi, a chhungten kum hnih chuang a chin an hriat theih tawh loh chu Myanmar ram chhungah a ruang hmuh a ni.
Thudawn danin, Freddy Lalengchhuaka (27), Champhai Electric Veng hi 2020 December 17 atang khan a chin hriat a ni loa, a chhungte leh YMA branch-ten an zawn hnu ah Champhai khawpui huamchhunga YMA branch ten an zawng leh a, Mizo dana ni sarih an zawn hnu ah pawh an hmuh loh avangin amah thlahna hun te hman zui a ni.
Nimin, 2023 March 5 zing khan Myanmar lam khua, Khawzim khaw mi ramkal ten mihring ruhro ni ngeia hriat an hmu a, an enchiannaah Freddy Lalengchhuaka bo laia a phone hman, sim card awm tawh lo chu chhar niin, a phone memory card atangin ama phone ngei a ni tih finfiah a ni. Ruang hmuhna lai vel an dap kualnaah a bo laia a silipar bun an hmu leh a, hengte atang hian ama ruang ngei tih finfiahah an inngai a, a ruang hi Pathianni la la khan an in thlenpui niin, tlaiah vui nghal a ni.