Covid-19 avanga ni tina nunna chan chu tun thla tir atang khan 80 per cent ah a tlahniam tawh tiin China thuneitute chuan an sawi a, hripui inkaichhawn nasatin ziaawm lam a pan zel anga ngaih a ni.
-- Advertisement --
Thla kalta khan Beijing chuan zero-Covid startegy a kalpui chu a hlip thut a, hei vang hian khawvela mipui tamna ber ram chu hripuiin a nuai zui hrep a ni.
Mahse, Beijing figure pekchhuah hi thil nihna dik tak ni dawn lo nasa anga ngaih a ni a, China hian Covid avanga nunna chan te official-a a puan leh thil nihna dik tak inmil thei lova ngaih a ni.
CDC chuan kar kalta khan Covid kaihhnawih avanga nunna chan 13,000 an awm a ti a, thla khat chhung velin mi 60,000 chuangin nunna an chan phah tawh a, heng nunna chan te hi hospital-a awm te chauh niin mimal chenna leh hmun danga mite chhiar tel an ni lo.
Hripui leng hrim hrim erawh December thla tawp lam kha a vanglai ni tawhin a tlahniam tial tial hrim hrima ngaih a ni a, nikum kum tawp leh kumin kumtir khan a nasa zuala ngaih a ni.
Tunkar Thawhtanni khan damdawi ina thi 896 an awm a, chu chu January 4 nena khaikhin chuan a tlakhniamna 79 per cent lai a ni tiin China’s Center for Disease Control and Prevention (CDC) chuan thuchhuah siamin a tarlang.
Thawhtanni vek khan damlo dinhmun hlauhthawnawm te pawh 26,000 an an tlahniam a, January 5 kha chuan 128,000 lai an awm a ni, tiin CDC chuan a tarlang bawk a. Mahse, hei pawh hi famkim lo hle a ngaih niin figure dik ta a phochhuak lova ngaih a ni.
China hian public holiday lian ber Lunar New Year chu a hmachhawn mek a, thuneitute chuan mipuite chu he hun puia an khaw lam pana zin lo turin an ngen hial a, a chhan ber pawh hripui inkaichhawn a nasat zual an hlauh vang niin mahse zawm a hlawh lo hle thung.
Thawhlehni khan Lunar New Year khualzin vanglai niin khualzin maktaduai 664 an awm tiin state broadcaster CCTV chuan official report a tarlang.