Sikin manding sap, i lungmawl e, i lungmawl e,’ tih leh KC Runremsangi hming hi mi tam tak bengah a inzawm thuk khawp ang. Puipunna hmunah mipui awitu, ‘upa zai’ hmanga mipui hiptu a ni a, Chapchar Kut-ah pawh zai ngei tura beisei a ni thin. Kumin India Republic Day lawm nan padma chawimawina dawng tur hming an puang a, chutah chuan a tel.
-- Advertisement --
“Mak ka ti. Hetiang hi ka beisei ngai lo a, ka dawn turah ka dah ngai lo reng reng,” a ti a, ni 25 zan dar 9 velah padma shri chawimawina dawng tura thlan a ni tih a hriat thu leh, mak a tih thu te a sawi.
Naupan tet lai, pawm rual a nih lai atanga zai thin a ni a, “Pawm rual ka nih laia ka zai kha, ka zai ta zel a, chawl lova zaiah ka inngai,” a ti.
Pawm rual lek a nih laiin a pain a zaitir thin thu te, thenawmte’n an zaitir thin thu te, a muhil lai te pawh kaithovin an zaitir a, a chang chuan tap chung tein a zai thin tih te a sawi.
“Kan lo thang lian a, Sunday School-ah min zaitir a, kan lo lian leh deuh a, YMA-ah min zaitir leh a, tichuan vawiin thlengin ka zai ta a ni,” a ti a, mahse tuna a sak thin “upa zai” hi chu a puitlin hnua a sak a nih thu a sawi.
1992-ah art & culture department-ah dance instructress hnaah a lut a, chutah chuan folk song lam a sa ta a, chu chu vawiina hriat a hlawhna a lo ni ta. “Lam chu ka zirtir tho a, mahse folk song lam kha sak a ngai a, ka sa ta a, ka tui ta em em mai a,” a ti.
A tirah a tui chuang lo a, a sawi danin, mi sak te chu a ngaithla thin a, mawi pawh a ti a, mahse a tui pha lo a, a sak turah a ngai lo. A sak phak turah a ngai lo a, mahse a tul avanga a’n sa kha, a tui ta em em mai a ni.
2000-ah khan ‘Mizo hla lenglawng leh upa zai’ tih ulbum a siam a, ‘upa zai’ a tih hi folk song sawina niin, ‘pi pu zai’ tia sawi thin a ni bawk.
“Upa zai hi sak nuam ka ti a, nawmsam lohna ka nei emaw chhungkaw thil vang leh thil dang vanga rilru nawm lohna ka nei te a nih loh chuan sak hi nuam lo ka ti ngai lo,” a ti a, a chawilartu nih pawh a duh a, a chak a, tum pawh a tum tih a sawi a, mahse, “Chutiang chu ka ni pha lo a, a chawilartu hi ka ni pha lo, kan sa hnem ve hrim hrim a ni mai a,” a ti.
Kuminah hian padma chawimawi dawng tur hian mi 106 thlan an ni a, March leh April velah India ram president-in a hlan thin. KC Runsemsangi hi art lama a thawhhlawk avanga thlan a ni a, Mizo-ah art lama dawng hmasa ber tur a ni