China northern Shanxi province-a kuang siamte chu an buai ngang mai. Tun hnai thla chhovah chawlhna hun nei thlawt lovin kuang an siam tiin BBC news correspondent a hmuna kalchilhtu Stephen McDonell chuan a sawi.
-- Advertisement --
Kuang lei tur a awm lo tiin thingtlang khuaa cheng pakhat chuan a sawi a, helaia kuang siam te chuan an ‘hausak phah ang’ tiin a sawi a ti bawk.
China-ah hian Covid avanga nunna chan zatah inhnialna a awm reng a, a zat dik tak hriat theih a ni lo va, hripuiin megacities te pawh a nuai vek tawh a ni.
China mipui 80% chuan billion khat chuang te chuan nikum December thlaa China-in khuahkhirhna a hlih hnuah hripui hi an kai tawh tiin epidemiologist Wu Zunyo chuan a sawi a. Kar tawp lam khan China chuan official-in kar khat pawh tling lovah nunna chan 13,000 an chuang tawh a ti a, nikum December thla atangin 60,000 chuangin nunna an chan phah tawh a ni.
Mahse, heng official tena nunna chan zat an sawi te hi damdawi Ina awm te chauh an ni a. Thingtlang lamah chuan medical facility tha avanga hei mai bakah hian mahni chenna Ina inenkawla thi te chu chhiar tel an ni lo bawk.
Hripui avanga thingtlanga cheng thi te official-a chhiarna a awm lo bawk a. BBC chuan nunna chan an tam hle tih finfiahna awm thei a ni tiin a sawi.
Mithi phumna hmun te kan tlawh a, an buai ngang mai a, lusun ten thawmhnaw var hain an hmangaih te ruang awmna kuang te an zui a.
Khaw pakhatah chuan mi pakhat leh hmeichhe pakhatin tissue paper-a siam sava lian tak an truck hnunga an dah lai kan hmu a. “Crane sava lem a nih hi, thih hnua an chuanna tur a nih hi” tiin an sawi a. Tissue paper hmanga an thil siam te chu mitthi vuina cheimawina kaihhawihah a demand a let thum velin a sang a ti.
Shanxi-a kan mihring tawn te chu funeral industry lam kaihhnawih te vek niin nunna chan tamzia leh chungte chu Covid kaihhnawih vek a nih thu min hrilh tiin Stephen McDonell chuan a sawi bawk.
“Damlo thenkhatte an chau hle tawh a, Covid an veia kum upa lam taksain a ngam si lo a ni,” tiin mi pakhat chuan a sawi a.
Heng truck-te hi kan zui a, an thil siam artwork te chu order tute hnenah an pe zel a, an pek zinga pakhat an mo chan hlim Wang Peiwei kan tawng bawk a.
An monu chu kum 50 bawr vel niin zunthlum reng tawh niin Covid a kai zui a. “Khawsik sang tak a nei a, a organ te a chhe zui a ni. Dam chhuak turin a immune system a chak tawk lo a ni,” tiin Wang chuan a sawi.
An chhungkua chenna tual chu ceremony decoration-in a khat a, thlalak, pangpar te a thahnem hle. Wang chuan an monu kuang chu mi 16-in an zawn ang a, an tih thin danin an vui dawn tiin a sawi.
Covid avanga nunna chan an tam em avangin mitthi vuina kaihhnawih man a sang turu zual hle chungin ui hauh lovin an sum neih ang ang pek belhin zahawm takin an thlah liam ang tiin a sawi a.
“Mi tha a ni a. A ropui thei angin, kan theihtawpa thain kan mangtha tur a ni,” tiin a sawi.
Kum tinin Lunar New Year lawm turin mi maktaduai tel te chu an hnathawhna hmun atangin an khuaa haw in an pan thin a, China a festival pawimawh leh hlu ber a nih vang a ni.
Mahse, an hawna an khua an ngaih em em, kum upa tam tak te chenna chu Covid avanga hmun him lo ber a nih zui phah ta thung. A tir atangin rengin Spring Festival ruala mass migration awm chuan hmun kilkhawr zawkah Covid a theh darh hlauhna a lian hle a. China sorkar pawhin ngenna siamin kum upa lam te avang tala an khuaa festival hmang lo turin a ngen a ni.
Thingtlang khaw lian lo taka Doctor Dong Yongming chuan an khuaa cheng 80% te chuan Covid an kai tawh a ti a. “Damlo apiang an lo kal a, clinic awm chhun a ni si,” tiin a sawi a. Nunna chante chu natna benvawn neisa an ni, a ti bawk.
Damdawi pawh fimkhur taka an sem thu sawiin Dr Dong chuan an mamawh bak kan pe lo, “Entirnan, mi pakhat tan ibuprofen tablet pali bak ka pe lo. Box hnih em em an mamawh lo, a kal ral mai mai,” a ti bawk.
Mahse, Covid vanglai chuan a liamsan tawha a hriat thu sawiin, “Tun hnai têah chuan damlo thar kan nei ta mang lo,” a ti bawk. Heng lai hmuna nunna chan te hi field-ah phum mai an ni thin bawk a. Tun hnaiah chuan ni tin nunna chan awmin mi sangkhat vel chenna khuaah 40 chuangin nunna an chan phah a ti bawk.
Thingtlang lamah chuan nunna leh thihna chungchangah ngaihdan hran an nei. Heng loneitute hi chuan kum dang ang bawkin an kumthar chu lawm an tum tlat. “Ka fapa leh ka monu pawh an lo haw ang,” tiin pa pahat chuan sawi a. Hripui an lo hawn i hlau lo em ni an ti a, “Mipui te hian an hlauthawng tur a ni lo. Kan hlau lo,” a ti a. “Biru pawh ni la i kai thei tho, a tam ber te chuan kan kai tawha kan tha alawm hei,” a ti bawk.
Covid chuan a vanglai a pel tawha an hriat thu sawiin tunah chuan nunna chan te phuma buai lovin hringnun kal zel dan tur lama buai chu tul an ti tawh zawk.