China balloon-in information la hman

Chinese balloon-te kumin kumtir lama US a thlawk te khan military base te atangin information tam tak a lakhawm hman tiin US media te chuan an sawi a, heng balloon te hi US fighter jet te chuan an kapthla a ni.
Balloon te hian an information lakkhawm chu Beijing lamah an thawn nghal zel tiin NBC News chuan US official te thusawi a sawi chhawng a.
Balloon hian thlalak aiah electronic signal hmangin information pawimawh te lakhawmin a thawn zel tia sawi a ni bawk.
US official te chuan Balloon an hmuh hnuah rang takin intelligence kaihhnawih thil pawimawh a lakkhawm theihna chu an dang chat hman tiin an sawi bawk a. Mahse, tun thlengin FBI te chuan balloon kehthem chu an la zirchiang mek reng an ti bawk a.
“Balloon-in a kawngzawh dan leh a kal kual vel theih dan chu kan hrefiah tawh a ni,” tiin FBI thupuangtu Sabrina Singh chuan a sawi a, mahse, balloon-in a bitum bik military installation te chu a sawi lang duh lo thung a.
“Tun thlengin China-in intel thil pawimawh a lak te hriatfiah tumin hma kan la mek a ni,” tiin a sawi bawk.
US official te chuan balloon chu Alaska leh Canada a awm laiin February thlaa American airspace a luh hmain an hriat tawh thu leh chhui zui tawh thu an sawi bawk a.
US thuneitute chuan balloon hi 200ft laia sang niin ni eng emaw zah continental US-a a thlawh hnuah 4 February khan South Carolina tuipui kam zawna a awm laiin kahthlak a nih thu an sawi a.
Chinese officials te chuan civilian weather balloon a nih thu sawiin US chu a kahthlak hial avangin tul hauh lova fimkhur uchuak tiin a sawisel a. Mahse, US media te chuan China chuan heng balloon te hi a thunun vek tia sawiin military base thahnem tak awmze nei takin a paltlang an ti ve thung.
Balloon avang hian ram pahnih inkarah inbakkaihna nasa zawk thlengin US Secretary of State Antony Blinken chuan China a tlawh tum a thulh phah hial zui a ni.
US fighter jet te chuan balloon chi hrang hrang China atanga chhuak nia a ngaih te chu a kap thla zui zel a, US defence department chuan China chuan khawvel hmun hrang hrangah balloon hi tam tak a tirchhuak tiin a sawi bawk.