Spain-a Catalonia-ah khawkheng nasa

Sau reservoir-a sangha awm te chu hnathawkte chuan lawngleng leh len hmangin man tumin hma an la a. An tum ber chu chung sangha te chu tui tlachhama an thih hmaa lakchhuah vek niin an thih chuan tui te chu mihringte hman atana lak tlak loh a ni mai dawn a ni.
Tui a tlem em em a, reservoir in tui a dawn theiha 10% chauh awm mekin hnawm tlingkhawmin tui chu a tihbalh vek hlauhna a lian tawh hle a, hei vang hian sangha te chu man an ni a. Sau a tui awm ang ang te chu reservoir dangah luan thlaktir a ni bawk.
“Tui awm ang ang te a rang thei ang berin kan sah a, tun dinhmunah chuan tui a la thianghlim a, mahse, thal tak takah chuan a bawlhhlawh vek dawn a, chuvangin sangha awm ang ang te pawh kan man mek a ni,” tiin Samuel Reyes, director of Catalan Water Agency (ACA chuan a sawi.
Sau reservoir hi Barcelona khawpui atanga 100km vela hlaa awm niin kum zabi zahve zet chu Catalonia north-eastern region a khawpui leh khaw hrang hrang te tuia chawm tu ber a ni. Mahse, tun hnaiah hriat theih china khawkheng nasa ber a thlen avangin tui a awm mang ta lo va.
Tunah chuan kum zabi 11-naa sak tawh Church of Sant Roma de Sau kum 1962-a reservoir siam a nih laia tuiin a chim te pawh a langsar tawh hle a. Ruahtui tam kum chuan he building hi tui chim chin vela awm a ni a, tunah erawh langsar takin a awm tawh thung.
Catalonia hmun tam zawk chuan kum hnih leh a chanve zet ruahtui a dawng tawh lo va. March thla tir khan reservoir a water level chu 8% a tlahniam belhin a hma kum aia a tlakhniamna chu 55% a ni tawh.
“Tun ang renga tui a kang ka la hmu ngai lo” tiin Agustin Torrent, kum 70-a upa helai bul hnaia cheng chuan a sawi a. “He reservoir hi a khat reng thin a nia. Mahse, climate change avangin hetiang hian a awm a, tu nge maw climate change engmah a ni lo ti reng reng ni le. An hnenah sawi tur engmah ka nei lo,” tiin a sawi.
Catalonia a chhim leh khawchhak lam te pawhin harsatna namen lo an tawk a. March thla khan Andalusia a Guadalquivir basin reservoir pawhin a capacity atanga chutin 26% chauh tui a nei tawh a. Catalonia interior, south-eastern Segura basin-ah pawh 36% chauh a awm tawh bawk.
March thla vek khan Spain meteorological agency AEMET te chuan Spain chuan kum khat kalta atang khan khawkheng a tuar tawh a ti a. Khawkheng tinte chu climate change thlen a ni hauh lo nachungin a tizualkai thung a. Khawvel chu industrial era atanga chhutin 1.1C in a lum zual tawh a, temperature te chu emission tihchhuah tihtlem a nih loh chuan nasa zual zel tura ngaih a ni bawk.
Europe khawmualpui bikah pawh Mediterranean Sea hnaiha awm Catalonia region te ang chu climate change tuar nasa zel tur a ni tiin, Barcelona based meteorologist Miguel Manzanares chuan a sawi a.
“Climate change-ah chuan Mediterranean area hi dinhmun derthawng ber a ni,” tia sawiin chu chuan France, Italy, Greece te bakah Balkans ram te chu dinhmun derthawng zualah a siam tiin a sawi a.
Khawkheng thleng chu a bik takin Catalonia bikah Barcelona leh a chhehvela cheng mipui tam zual zelin a tizualkai a tibawk a, heng hmunah hian mihring maktaduai 5.5 vel an chrng anga ngaih a ni a. Catalan regional sorkasr chuan tui renchem kalpuiin car silna, thlai tui pekna leh industry kaihhnawiha hman te chu 15% velin a tihniam a ni.
Agriculture lama tui hman turu lutuk pawh tihtlem niin local government te chuan 40% ah an tihniam dawrh tawh bawk a. Chu chuan Barcelona leh a chhehvela loneitute tan harsatna erawh a thlen belh thung.
“Thlai tam zawk kan ching thei lo a nih chuan tharchhuah a tlem dawna chu chuan tlakchhamna bak a thlen dawn lo,” tiin Agutine Garcia Segovia, EL Prat agriculture co-operative president chuan a sawi a. “Spain mai bakah ram danga thawnchhuah thlengin a nghawng dawn a, thil man a tisang ngei dawn a ni,” tiin a sawi bawk.