China ramri bula IAF base hawn turin peih tawh

October thla hian Ladakh-a India leh China inrina bul lawka siam, Mudh-Nyoma Indian Air Force (IAF) base chu hawn tuma ruahman a ni a, thla laihawl velah Prime Minister Narendra Modi-a’n a hawng dawn nia sawi a ni.
Airbase hi tuipui atanga feet 13,700-a sang a awm a ni a, Ladakh khawchhak lama Indian sipaite inralrinna leh innghahna a tichak thei tura ngaih a ni.
A bik takin he lai hi India leh China inrina, Line of Actual Control (LAC)-a an intihbuai fona hmun a ni a, India himna tan a pawimawh hle tura ngaih a ni.
Airbase hi LAC atanga km 30 vel chauhva hlaah awm a ni a, boruak duhawm lo a thlen palh pawha sipai leh an hmanruate rang leh awlsam zawka chah leh phurh thlen theihna tur, an inchhek theihna hmun a ni thei dawn a ni.
A hming, Mudh-Nyoma IAF base tih Nyoma bul lawka khua, Mudh nena la kawpa phuah a ni.
Airbase-ah hian thlawhna tlankawng (rigid runway) km 2.7-a thui a awm dawn a, thlawhna hunna hmun (hangar) leh rikrum a awm pawha rang taka chet chhuah theihna tura inralrinna a awm ang a. Air traffic control complex leh sipai awmna tur a awm bawk a ni.
A taka hman tura hawn a nih hunah chuan airbase-ah indo thlawhna bakah sipai leh an bungrua phur thei thlawhna chhawp a ni dawn a. Ladakh leh a chhehvel thlithlai thei tur drone khalh pawh he hmun atanga tih theih tur niin radar chhawp a ni dawn bawk.
Airbase hi Border Road Organisations (BRO)-in a siam hna thawkin September, 2023 atang khan an thawk tan a. A hmun chhengchhiain rem lo hle mah se rang taka thawkin a peih tak hi October, 2024 khan an peih a, sipai awmna atana mamawh thil dang siam belh leh a ni.
A awmna hmun hi a san em avangin a vawt hle a, thlasikah phei chuan -30°C thlenga vawt a nih thin avangin mihring leh hmanraw tan hna thawh theih hun chhung a rei lo em em a, heti chung hian thlawhna tlankawng bik hi chu thla sarih chhungin an siam zo thei a ni.
“Hmanraw mamawh zawng zawng hi phaizawl atanga phurh luh vek a ni a, kalkhânte chu thlasikah chuanvurin a hnawh vek thin a. Hei vang hian kum khat chhungin hna thawh theih hun chhung hi thla sarih vel emaw chauh a ni a. A siam nan hian tun lai thiamna thar ber ber hman a ni a, tha leh rintlak hle tura ngaih a ni,” tiin sipai thuneitu sangte chuan an sawi.
Ladakh khawchhak lam hi India leh a thenawm, China sipaite inep fona, ram an inchuhna thin a ni a. Kum 2020-ah phei kha chuan an inep na hle a, lehlam lehlam hian sipai pawh ramri-ah an chah khawm nasa hman a; mahse, hun rei tak chhawng eng emaw zata indawr a nih hnuah tunah chuan sipaite pawh an hnuk kir a, a pawh pawh an inpawh leh tan tawh viau a ni.