Chinese surveillance balloon tun kara US-in a kahhtlak tak chuan communication signal te a dawng khwm thei tiin US official te chuan an sawi.
-- Advertisement --
Antenna thahnem tak ‘intelligence collection operation’ tihtheihna a keng tel teuh tiin State Department official te chuan an sawi bawk a.
Ningani khan US lawmkaer te chuan balloon chungchangah China chu demawm an tih thu resolution an pawm fel bawk a. China erawh chuan balloon chu spy-na atan a hmang lo va, weather device niin a kal peng ta a ni, an ti ve thung.
US thung chuan balloon chu surveillance balloon thahnem tak China in khawmualpui panga enthlak nana a hman mek zinga mi tiin an sawi ve thung a.
House of Representatives lawmakers te chuan balloon chan ‘United States sovereginty huangtau takin a bawhchhia a ni’ tia sawiin a demna thu vote lakah 419 in an vote a, vote duh lo pakhatmah an awm lo.
China balloon-in US a luhchilh hian ram pahnih inkara chhe zawka siamin US Secretary of State Antony Blinken an China tlawh a tum pawh a dawn ruaiah a thulh phah a, kum thum chhunga US-China inbiakna neih hmasak ber tura ruahman chu a tlawlh zui a ni. US chuan Atlantic Ocean chung zawna a awm laiin fighter jet hmangin balloon hi a kapthla a ni.
China thung chuan surveillance balloon fleet a neih loh thu sawiin chutianga nei anga an puhna chu US in China laka public opinion warfare a kalpuina mai mai a ni, tiin Chinese Foreign Ministry thupuangtu Mao Ning chuan a sawi.
China chuan US President Joe Biden-an PBS interview a neihnaa Chinese leader Xi Jinping chuan ‘harsatna nasa tak a nei’ a tih chu sawiselin hetianga Biden thusawi duhdan hi ‘diplomatic basic protocol bawhchhiatna leh tul lo a ni’ tiin Ning chuan a sawi bawk.
Senior State Department official chuan China balloon an kahthlak chuan high resolution image a nei a, solar panel lian tak neiin chumi hmang chuan intelligence collection sensors mai bakah antenna te neiin chu mi hmang chuan geo-locate communication te a lakhawm thei a ti bawk.
US chuan Chinese sorkar nena inzawm nei he balloon siamtu leh enkawltute chu a hrek thei tiin official te chuan an sawi bawk a. Tuna a landanah chuan US thuneitute sawi angin balloon chu inenthlakna hmanrua ni ngeia a lan thu sawi a ni a.
“Balloon-in antenna a ken te hi surveillance technology niin scientific mission neiha hman thin a ni” tiin Gregory Falco, assistant professor, Johns Hopkins University a Department of Civil and Systems Engineering chuan a sawi.
China-in he balloon mission hmanga data lakkhawm a tum te hriatfiah chiah theih a la ni lo va, mahse, mithiamte chuan radio, cell phone leh communication pawimawh dang military base atanga chhuakte lakkhawm a tum anga ngaih theih a ni, tiin Matt Kroenig, senior director, Scowcroft Center for Strategy and Security, Atlantic Council chuan a sawi.
Balloon-in solar panel lian tak a nei leh US airspace a hun rei tak chhung a cham thei chu ngaihthah theih a ni hauh lo, tiin Dr Falco chuan a sawi bawk a.
“High-powered system data relay tam tak ti thei an nei tihna a ni” tia sawiin Dr Falco chuan, “Eng nge an lakkhawm chiah ka hre lova, mahse, satellite a data a tam thei ang ber lakhawm turin mechanics pawimawh chu a awm chiang a ni,” tiin a sawi bawk.
US chuan China-in data pawimawh te a lakkhawm loh nan chetlakna a nei thei a, chung zingah chuan jamming equipment pawh a hmang thei tiin Dr Kroenig chuan a sawi bawk a.
FBI te chuan an lab hmangin balloon kehthem an lakkhawm te chu an zirchian mek thu sawiin tunah erawh balloon canopy, wires leh electronic components te chu tuipuiah a then la awmin la lakkhawm mek a ni an ti.
Balloon-in a chunga a phurh tam ber te surveillance gear ang te leh investigator tena an duh te chu South Carolina coast a tuihnuaiah a la awm mek a. Officials te chuan a kehthem zawng zawng chhar khawm vek tur chuan hun a la ngai deuh dawn an ti bawk.
United Staes chuan American khawmualpui mai ni lo, China hian khawmualpui panga laiah heng balloon te hi a tir chhuak mek tiin a sawi bawk a. Balloon te hi inenthlak nana hman ngei nia ngaih niin mahse China sorkar chuan pha tlatin weather device a ni a, a nih tur ang ni lo va kalpeng ta a ni tiin a sawi lui ve char char thung.