Ukraine leader chuan EU leaders te chu fighter jets leh ralthuam te Russia nena an indona kal mekah pe turin a ngen nawn leh a, tun hi indona chhuah hnua ram pawn a zin tum hnihna a ni tawh.
-- Advertisement --
“Kan thawhhona chak zawka kan kalpui a ngai a, min runtute lakah chak zawka kan chet a ngai a ni” tiin Volodymyr Zelensky chuan a sawi.
Zelensky hi Brussels-a European Parliament a thusawina a neihah pawh standing ovation pek a lo ni tawh a. EU leader te chuan Ukraine hnenah indo thlawhna pek a nih dawn chuan inlungruala tih a ngai an ti.
A thente chuan indo thlawhna pek chuan Russia nena buaina zau zawk a hrinchhuah hlauhna an nei thung a. Hetih lai hian Kremlin chuan chiang takin khawthlang ram te chu fimkhur turin a vau zui nghal thung.
Zelensky chuan EU hruaitute nena inremna an siamte chu pawimawh tia sawiin mahse mipui hriata tlangzarh a la ni lo va, presidential adviser Mykhaylo Pdolyak chuan Ukrainian TV hnenah long-range missile leh attack aircraft te chu kuminah an dawng hman ang a ti a, mahse, inremna tihfel a la ni lo a ti thung.
UK chuan Ukraine hnenah nakin zelah pawh fighter jet pek tur a ni em tihah thutlukna a la siam lo tia sawiin mahse Ukrainian pilots te training erawh a pe dawn tiin a sawi.
Poland prime minister, Mateusz Morawiecki chuan an ram chu ‘Nato duh dana kal mai tur’ an nih thu sawiin Dutch Prime Minister Mark Rutte pawhin fimkhur taka la ngaihtuah ho ngai a ti bawk a. European Parliament Presdient Roberta Metsola chuan EU states te chu Kyiv in fighter jets a dil chu ngaihtuah rang turin a ngen thung.
Brussles-a Parliament-a thusawina a neihah Zelensky chuan Ukraine chu Euroepan way of life nen a thlunzawm a. Ukraine chuan EU zawm hi dil tawhin bloc leader te chu a rang thei ang bera a dilna te ngaihtuah turin a ngen bawk.
“Ukraine hi European Union member a ni dawn” tia sawiin Zelensky chuan Europe nena tangrualin Ukrainian te chuan ‘modern world a anti-European force lian ber lakah a inveng a ni’ tiin a sawi bawk a. Nikum khan EU leader te nena an inhmuhnaah pawh Zelensky chuan Ukraine zalena a awm lo a nih chuan EU a him ngai dawn lo tiin a lo sawi tawh.
Zelensky hian a hmain Germany leh France hruaitute pawh lo hmu tawhin ram pahnihte chu ‘game-changer’ ni thei tiin a sawi a. Ukraine in long-range weapons leh modern fighter jet te a dawn hma poh leh ‘Russian huangtauna a tawp hma a ni mai’ tiin a sawi bawk.
President Macron chuan fighter jet pek lamah inhawnna a neih laiin Scholz erawhin chu lam hawi chu sawi a la nei duh miah lo thung.
French leader chuan Ukraine chuan France thlawpna a chhiar thei ang a ti a, Ukraine-in hnehna a chan ngei theih nan a pui dawn a tih laiin German Chancellor Scholz chuan “Ka dinna a la ngai reng: He indonaah hian Russia a chak tur a ni lo” a ti ve thung.
Hetih lai hian Moscow chuan Khawthlang ram te chu Ukraine hnena ralthuam pawimawh pe lo tura ti ve rengin inrunluihna thleng lo se a ti a. Kremlin thupuangtu Dmitry Peskov chuan indonaah UK, France leh Germany te chu an inrawlh thuk tial tial a ti bawk a.
“Heng ramte chet dan hi pawi kan ti a, buaina an tipunlun zel zawk ang a, Ukraine tana tawrhna nasa zawk an thlen mai mai ang,” tiin Peskov chuan a sawi.
Khawthlang ram te chuan Ukraine hnenah hian ralthuam pawimawh hrang hrang an pe tawh a, tun hnaiah tank te pawh pein hei hian Ukraine sipaite chu a thuamthat phah hle tura ngaih a ni a, Russia erawh a lawm lo hle thung.