Chinese palaiin India nena an inkarah beiseina nei sang

Mumbai-a People’s Republic of China Consul General Qin Jie chuan India leh China inlaichinna hma lam hun chungchang sawiin Prime Minister Narendra Modi-a leh President Xi Jinping-a an inbiak atang khan beiseina êng a awm zel thu a sawi.
New Delhi-a neih tur BRICS Summit chuan inzawmna thuk zawk siamna hun remchang a siam dawn tih a sawi bawk.
Consul General chuan thuthar thehdarhtute a kawmnaah, “Inlaichinna hma lam hun atan kan hruaitute kaihhruaina hnuaiah India leh China inlaichinna hian kawng dik kan zawh mek a. Tun hnai kum hnih chhung khan vawi hnih an inhmu tawh a ni,” a ti.
Kumin hian India-a BRICS Summit neih tur chungchang sawiin, “Kuminah hian BRICS summit hi Delhi-ah neih a ni ang a, nakkumah China-ah neih a ni ang a. Hei hian kan inzawmna leh inthian thatna thuk zawka siam theihna hun remchang bik min pe ang a, kan mipuite hlawkna tur leh khawvel pum huap dinhmun nghet zawk kan neih theihna tura hma kan sawn theihna tur hun remchang bik min pe ang,” a ti.
March thla khan Chinese Foreign Minister Wang Yi-a chuan Beijing-a National People’s Congress vawi 14-na session lina neihna kara thuthar lakhawmtute a kawmnaah New Delhi leh Beijing thawhhona tihchak a duh thu a lo sawi tawh.
Ram palai hlun tak chuan ram pahnihte thawhhona pawimawhzia sawiin, “India leh China hian kum hnih lo awm leh tur chhunga BRICS president nihna a chelh hi a hman tangkaia an inthlawp tawn a ngai a ni,” a ti.
Hetianga Asia ram liam pahnih inkar tihthat lehzualna tura ngaihdan awm mek hi khawvel pum huapa buaina nasa tak a thlen lai a ni a, a bik takin Asia khawthlanga US leh Iran inkara buaina chhuak nasa tak karah a ni.
Asian palian pahnih inkara inpumkhatna awm thei tur chungchang sawiin Wang Yi-a chuan an thawhdunna hian khawvel pum a nghawng theih dan a sawi a. “Kan thawhhona chuan khawvel chhim lamah beiseina thar kan thlen thei a ni,” tiin BRICS tangruala tel hruaitu inzawmkhawm chu ram thang mekte tana dinhmun nghet tak a nih tur thu a sawi.