Chinghniain sial seh vangin a vulhtute buai

Tunlaiin Sailulak-ah chinghniain sial a seh \hin a, sial an chan nual tawh. A vulhtute an buai a, ramhnuaiah sial vengin an hnatlang \hin.
Sailulak-ah hian sial 300 vel a awm a, chhungkaw 46-in an vulh. Chinghnia hian kum tin a tibuai tih an sawi a, sazuk leh sa dang pawh chinghnia hian a seh \hin tih an sawi bawk.
Sailulak Sial Vulh Association president Lalramthanga sawi danin, kuminah May-ah khan chinghniain sial hi a seh \an a, se ruang an hmuh tawh hi 12 niin, an hmuh loh hi a tam zawk a nih an ring. Chawlhni leh Thawh\anni pawh khan a seh.
Sailulakah hian ramhnuai zau tak ‘Ran Complex’ an nei a, square kilometre 17 vel a ni. Chutah chuan sial hi an thlah \hin a, ramhnuaia an tla lai chu chinghnia hian a lo seh \hin a ni.
Chinghnia hi a tam tia sawi tur chu a ni lo a, a ruala awm, rual khat an ni tih an sawi. Sial hi an beih rawn ta \hin a, ram zau taka tla an nih avangin a neitute tan ven sen a ni lo.
Tun hnaiah sial hi an khalhkhawm a, ven theih tura awmkhawmtir an tum. Mahse chaw (hnim) ei turin a daih rei lo ang an ti a, chuti chung chuan venhim phawt a \ul an tih avangin hnatlangin an khalhkhawm a ni.
“Chinghnia hi kan that lo. Beih an har, pasal\ha te kan ni lo bawk a. Tin, forest department mitmei ven a na bawk a,” an president chuan a ti.
Sailulak hi lui pathum- Khawchhak Tuipui, |iau leh Zuva te karcheh a ni a, ramngaw pawh a \ha. Sazuk pawh a tam a, sa dang pawh a awm. Chung chuan chinghnia hi a hip niin an hria a, nghal rual an kalin chinghnia-in an zui \hin bawk. Sial bakah sanghal leh sa dang pawh hi chinghnia hian a seh \hin an ti.