H&TE minister insawifiah phut

Higher & Technical Education department hnuaia hnathawh chhiat lutuk chhan sawifiah turin minister Dr R Lalthangliana an phut tih ZPM Thalai chuan an sawi.
ZPM Thalai Hqrs. hruaituten thuthar thehdarhtute an kawmnaah Govt. Mizoram Law College sak mek chu a hmunah an endik a. An hmanraw hman leh a sak dan a lungawithlak loh hle tih sawiin, mipui leh zirlaite tana lawmna tur thil danglam hmuh tur a awm lo tih an sawi a. Law College-ah college danga an hman duh tawh loh bus hlui tawng tak pakhat chiah awm chu zirlaiten harsatna an tawh phah tam niin an sawi a. MNF sawrkar chu zirna pawngsualnaah an ngai tih an sawi bawk.
Govt. Mizoram Law College satu Sky Ridge Construction & Consultancy Services chuan RUSA 2.0 component 9: Infrastructure Grants to College hnuaia hna 35 awmah hna 15 chu restricted tender hmangin an thawk tih an sawi a. Thil rinhlelhawm tak inphumru a awm ngeia an hriat thu ZPM Thalai sawiin, a changtu minister Dr R Lalthangliana chu a department chanpual hnuaia hna chhe lutukte sawifiah thuai turin an phut tih an sawi.
MNF sawrkarna hnuaiah sum siamna atana zirna in sak hman a nih thu ZPM Thalai hruaitute chuan sawiin, Mizoram Law College sak mek chu MNF sawrkarna a tawp hma ngeia tha taka sa zo ngei turin MNF sawrkar an phut tih an sawi.