Cholesterol level tihhniam nana thil pawimawh

Cholesterol level tihhniam nana thil pawimawh
Mahni hriselna invawn kawngah kan harhthar ve zel a, cholesterol level a san chuan lung (heart) tan a tha lo tih te kan hre ve deuh fur tawh a, ngaihthat loh nachang te pawh kan hre ve tawh. Cholesterol hi lung (heart) lam natna hrang hrang thlentu bulpui ber pakhat niin, a sang tur inven lawk a pawimawh hle a ni. Healthy Living Diet Clinic, Mumbai-a Sr. Registered Dietician and Diabetes Educator Sunita Pathania-i’n cholesterol vanga kan buai lohna tura kan tih tur pawimawh ni a a sawi kan rawn tarlang e.
1. Sa ei tlem rawh. A bikin sa ti sen (red meat) ei tlem rawh, Sa hian cholesterol level a tisang thin. Sa i ei a nih pawh bawngsa, vawksa tih vel ei tam lo la, sangha ei tam zawk rawh. Arsa i ei pawhin a thau leh a vun tel loin ei thin ang che.
2. Nitin kan ei leh inah fibre 5-10 grams vel tak awm thei se a tha, chu chuan cholesterol level sang tur risk pawh 5%-in a tihniam thei.
3. Cholesterol test fo rawh, chu chuan i taksaa cholesterol awmdan a hriat tir che ang a, a pawi hmain i lo fimkhur lawk thei ang.
4. Mawm ei tlem rawh. Thil mawm ei tlem hian kan taksaa cholesterol sang tur nasa takin kan veng nghal. Chawah thlai hnah, a rah leh thei lam te ei nasa la, nuts lam chi ei tam ang che.
5. Mawm kan ei duh a nih pawhin thlai hriak lam ei zawk tur a ni a, canola oil, olive oil leh soyabean oil lam te hman uar zawk tur a ni.
6. Nitin minute 30 tal exercise la thin ang che. Exercise lak that hi lung lam natna pumpelh nan a pawimawh hle.
7. Sangha hian omega-3 fatty acid an pai deuh vek a, chu chu cholesterol tihniam thei a ni, chuvangin kar khatah sangha vawi 2-3 tal ei tum ang che.
8. Nuts ei hnem rawh. Chawei hmain i ril a tam deuh a nih chuan thildang ei loin nuts te han hmawm zeuh zeuh la. Nuts hi a hrisel mai bakah mi a tipuar ve thei riau a, lung tan a tha tho bawk si.
9. Inti cher rawh, chu chu cholesterol level tihhniam nan a pawimawh hle. Kan san zawng leh taksa rih zawng inmil tawk tur a ni a, mi thau lutuk te hian lung natna neih theihna risk an nei sang bik.
10. |um khata thil ei tawk chin loh tur. I chawhmeh duh zawng hmeh tih vanga ei tawk mai te hian cholesterol level a tisang duh hle a nia. Vawi khata tam tak ei loin, a khat tawka tlem tlema ei a tha zawk.
11. Kein kal tam rawh. Chhuahvah dawn hlek lirtheia chuan zel hian mi a tithau a, kan cholesterol a lo san phah thin. Kea kal hi physical activity tha ber a ni.
12. Artui ei tlem rawh. Cholesterol lama harsatna nei tan artui hi hmelma ang deuhah kan ngai thin. Mahse, artui tlem tlema ei chu a pawi hran lo, a kan nan tel tlemte chauh hmang la. Artui chu ei tam i duh chuan a chhungmu tel loin, a pawn var chauh ei la, a pawi lo.
13. Green tea-ah hian catechins a tam a, chu chuan cholesterol a tihniam thei. Green tea ni khatah no 3-4 te inthei la a tha hle ang.
14. Zana mut that hian kan blood sugar level a siamtha a, rilru lam thlengin a tihrisel a, cholesterol risk a tihniam bawk.
15. Mei zu mi i nih chuan sim hlauh rawh. Mei zuk hian cholesterol level a tisang thei tlat. Mei zuk hian HDL (cholesterol tha chi) level a tihniam a, chu chuan lung natna a thlen duh hle.
16. Purunvar ei tam rawh. Purunvarah hian organo-sulphur a awm a, chu chuan kan thisena thau tha lo awm te a paihchhuak thin a, thisenzam tam a tha hle a, cholesterol level a tihniam thei. Nikhata purunvar mal 2-3 vel ei ziah theih a tha.
17. Zu in tlem rawh. I lung hriselna i ngaipawimawh a nih chuan zu i in duh a nih pawhin nikhatah no 2 aia tam in suh. Zu hian cholesterol level a tisang thei.