Dar-chaka ti mai ang!

Dar-chaka ti mai ang!
A hming chu Abhishek Choubey a ni a, mahse, a hminglemah Dar-chaka pawh ti ila a inhmeh ngawt ang. A dar (shoulder blade) chauh hmangin kg 55.4 a rit a chawi kâng thei a, lirthei kg 1294 a rit a hnuk tawlh thei bawk a, Guinness World Records chi hnih a siam e.
A ding leh veilam dar kar chu tichipin, chumi hmang chuan kg 55.4 a rit a chawi kâng thei a, a dar kar tihchipin lirthei hnuhna tur hrui an kilhbehna thing bung a chep bet a, tichuan lirthei kg 1294 a rit a hnuk tawlh theih bawk. Pui ve mai mai tak a ni!
Doctor ten an endiknaah Abhishek hian a dar ruh engtinmah a tidanglam lo a, hetianga thil rit chawi leh hnuk tawlh theih turin a dar ruh chu midang dar ruh aia a danglamna bikna pawh a awm chuang lo a, a danglamna awm chu chu a tipawng chhuak nasa thei e tih a ni mai a, mahse, chu vanga a dar ruh chu a chak bikna chhan tur a awm chuang lo!
Abhishek hian mipa naupang kum 11 mi vel a nih lai pawhin a dar ruh hi a thiante kut cheh beh nana hmangin, infiamnan tak a lo hmang tawh thin a, chuta tang chuan thil rit deuh deuh te pawh a chawi kang thei tih a hriat belh ta zel a, a inzir zel a, bike te a hnuk kal thei ta hial a, 2017 khan World Record siamin, 2023-ah a siam nawn leh a, Guinness World Record pahnih a siam hnuah phei chuan a thiamthil danglam hi entir turin khawvel hmun hrang hrang atangin sawmna a dawng chamchi ta a ni.
2017 khan car kg 1070 a rit chu a dar ruh hmang hian metre 27 a thui hnuk tawlhin record a siam a, a record siam hi 2021 khan Cuban Christian Emmanuel Castellanos-a’n khum tumin a bei a, mahse, a hlawhchham. 2023 khan amah, Abhishek bawk hian a record hi khumin, kg 1294 a rit a hnuk tawlh leh ta a, he record hi vawiin thlengin khum thei an la awm ta rih lo a ni.