City an chak laiin Liverpool an tlawm

Inrinni zan khan English Premier League 2025-26 khelh chhunzawm a ni a, team lian Manchester City in hnehna an chan laiin champion lai Liverpool erawh chu mikhual an nihna hmunah an tlawm ve thung. Champion lai Liverpool in result chhia an nei chhunzawm zel hian manager Arne Slot ban hun a tihnai ve zel nia ngaih a ni.
City 2-0 Wolves
Khelh li chhung chakna chang zo lo zawn tawh Manchester City hian Etihad Stadium-ah table mawngphah luahtu Wolves an mikhual a, si hnih faiin hnehna an chang. An mualah an chak vangin City hian hmahruaitu Arsenal an inkar an tizim a, champion theih beiseina sang zawk an nei. City in hma lam an pan laiin Wolves erawh chuan table mawngphah an luah nghet deuh deuh zel thung a, thlak hniam an hnaih viau tawh.
City hian an hneh ngei tura ngaih Wolves lakah bul an tan tha a, goal pawh an thun thuai. Inkhel tan atanga minute rukna lekah Omar Marmoush chuan Matheus Nunes cross chu fuh zetin a tauh goal a, hmahruaina goal a thun. Hma takah goal an thun vangin an phur a, an mikhualte hi an sawp deuh nek tura ngaih a ni hial bawk. Goal thun hma viau mah se goal dang an thun belh thei lawk lo thung. Goal hmahruai thuntu Marmoush chuan goal a thun belh teuh viau a, goal post a pet per dawp. Marmoush-an hun tha a hlah bakah hian penalty an beisei thlawn bawk.
Goal an thun belh theih lawk loh hnuin City an che fuh nawn leh a, chawlhlawk hmain goal an thun belh leh. Chawlhlawk dawn hnaih minute 45+2-ah an player thar Antoine Semenyo chuan fuh zetin a pet goal a, an goal hnihna a thun. AFC Bounrmouth atanga an lak luh Semenyo hi a chetha nghal viau a, City tan inelna hrang hrangah vawi li khelin goal thum a thun tling der tawh.
Chawlhlawk hnu lamah inkhel hmuhnawm chhunzawm viau mah se goal a luh belh thei tawh lo. Khelh li chhung ngawt hnehna an chan theih tawh loh hnuin City chuan an mualah hnehna an chang ve leh ta nge nge a, hmahruaitu Arsenal nen point thumin an inkar an tizim. Pathian zanah Arsenal in point an hlawhchhuak zo lo a nih chuan City nen hian point li chauhin an inthlau dawn a, City tan champion a beiseiawm leh zual sauh dawn. City in champion an beisei laiin Wolves erawh an dinhmun a chhe viau tawh a, tun dinhmunah pawh him turin poin 14 ngawt an mamawh a, an tlahniam nge nge dawn niin a ngaih theih hial tawh.
Manchester City hian Nilai zanah Champions League khelin, UCL-ah Galatasaray an mikhual ang a. Pathianni zanah AFC Bournmouth an hmachhawn zui leh ang.
Liverpool an tlawm
Team lian Manchester City in point thum an hmuh laiin champion lai Liverpool erawh chu AFC Bournemouth lakah 3-2 in an lo tlawm ve thung a, champion nawn leh an beiseia a chuai deuh deuh zel.
Liverpool hian mikhual an nihna Vitality Stadium-ah bul an tan tha lova, Virgil van Dijk tihsual vangin goal an chhuah. An khingpuite tihsual hlawkpuiin Bournemouth tan Evanilson chuan minute 26-naah hmahruaina goal a thun. An mualah goal an thun hmasak vangin an phur viau a, goal dang pawh an thun belh leh thuai. Minute 33-naah Álex Jiménez chuan an goal hnihna thunin an hmahruaina a tizau.
Si hnih an phurh hnuin Liverpool an insiamtha a, Virgil van Dijk chuan a tihsual siamthat nan minute 45-naah goal thunin an si phurh a sut then a, 2-1 a hnufual zawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal pawh a luh belh lawk thei lo. Tlawm pumpelh tuma tan khawh Liverpool tan Dominik Szoboszlai chuan minute 80-naah goal thunin an si phurh a sut zo a, point hlawhchhuak ngei turah an inngai hman hial. Point hmuh tum viau mah se hun pek belh tawp dawnah goal an chhuah leh tlat thung. Bournemouth tan Amine Adli chuan minute 90’+5-naah hma an hruai nawn lehna goal a thun a. He goal hi team lian Liverpool lakah chakpuiin, point thum hlutak hmuh nan an hmang.
Liverpool hian result tha an nei hleithei meuh lo va, manager Arne Slot dinhmun a derthawng zual zela ngaih a ni.