City Center Annexe sa zo rang turin Subject Committee-in ngen

City Center Annexe sa zo rang turin Subject Committee-in ngen
Mizoram Legislative Assembly hnuaia Subject Committee II chuan Nilaini khan Bazarpuia Aizawl City Center Annexe sak mek chu a hmunah an enfiah a. An chairman Lalchhuanthanga bakah member – W Chhuanawma, Lalmuanpuia Punte, Er H Ginzalala, T Lalhlimpuia, RM Chakma leh Prova Chakma an tel.
Anmahni lo dawngsawngtu Commerce & Industries officials leh contractor nen an inkawmnaah Assembly Subject Committee II chairman chuan ram hmasawnna hnathawh reng reng hnathawh hun chhung bi tuka thawh zawh loh tam thin lutuk chuan sawrkar mai ni lo, a chhawrtu tur mipui nunphung a tibuai a, chhungkaw khawsak a tibuai thin tih a sawi a. Contractor-ten revised estimate an beisei leh thin a, sawrkar sum pawhin a tuar phah a, ram hmasawnna a muan phah hle tih a sawi bawk.
Aizawl City Center Annexe pawh sak zawh hun tura ruahmanna siam a pel thui ta hle, tiin, “Harsatna hrang hrang a awm ngei ang, chutih laiin mipuiin kan chhawr duh tawh a, kan mamawh tawh. Zan lamah pawh thawk mai turin contractor-te ka ngen che u,” a ti.
Aizawl City Center Annexe hi Bazarpui building sak mek bula awm a ni a, nuai 3641.59 senna tura ruahman a ni. NEDP project niin, Lushai Engineers-in sak hna a thawk. 2018 September 28 khan contractor hnenah sawrkarin Letter of Acceptance a pe a; agreement ziah atanga thla khat chhunga hna tan tur a nih laiin, Bazarpuia eizawngten kum 2018 leh 2019 hunpui vuakvetah awm an dil a, an insawn lailawkna tur NEC sum senga sak peiha nih loh avang leh geo-technical investigation neih avangte in 2020 June 24 khan hna hi tan a ni.
Bazarpui building thar, Aizawl City Center hi Aizawl Smart City hnuaia sak a ni a; City Center Annexe hi Commerce & Industry hnuaia sak niin, Lushai Engineers-in a sak hna an thawk ve ve a ni.