City chhuahsan lo tura Guardiola duhtu Rooney

|hang khat lian zet Manchester City manager hna chelh tawh Pep Guardiola chu season tharah hian Etihad club-ah a cham chhunzawm dawn em tih a chiang ta lo ve ta a, he boruakah hian Manchester United captain hlui, tuna coach ni ve tawh Wayne Rooney chuan season tharah pawh Spanish coach chu City boss a nih chhunzawm zel a beisei thu sawi chungin, chhuak lo tura a duh chhan pa wh manager dang zawng zawngte tana entawntlak a nih vang niin a sawi.
Kum 55-a upa Guardiola hi kum 2016 atang khan City-in an ruai tan a, tun thlengin Premier League title paruk tehreng lakpui tling tawhin, tun season-ah hian a vawi sarihna atana English champion nihpui leh turin dinhmun chhe lo takah a pawlte chu a dinpui leh mek a, Premier League table-ah City chu pahnihna niin, hmahruaitu Arsenal lakah point ngain an la hniam.
Manchester club-a Guardiola hmalam hun hi tun season tawpah a chiang chauh mai thei a, a chhuah ve tawh mai hlautu England forward hlui Rooney chuan:
“Player thenkhat chuan chhuak turin an duh mai thei a, player dangin cham zui zel turin an duh ang a, khelhna hmun chan leh chan lohin kan dinna pawh a hril ve lo thei lo a, kei chuan season tharah pawh Manchester City manager la nih chhunzawm zel se ka duh a ni.
“A cham ngei pawh ka beisei a, a chhan pawh Premier League tan hian a hlu thlawt a, nangni pawhin Premier League-ah hian khawvela manager tha ber ber awm reng se tih in duh ve ngei ang.
“Tun kum 10 liamta chhung khan mi zawng zawng tan entawntlak a ni a, sulhnu tha a hnutchhiah tlat a ni,” tiin The Wayne Rooney Show episode thar berah a sawi.
Nikum December thla khan Chelsea boss hlui Enzo Maresca chu Guardiola hnuaia coach hna a lo thawh tawhna City-a kirleh tura sawirik a rawn ni hluai a, he mi chungchangah pawh hian Rooney chuan Spaniard a chhuak dawn rau rau a nih pawhin an club legend ruai thei se City tana a that zawk a rin thu sawiin:
“Pep hi a lo chhuak ta a nih pawhin Bayern Munich boss ni mek Vincent Kompany lam hi an hawi ka duhsakpui zawk.
“An captain hlui hian club a hrechiang a, Bayern-ah ni se coach ni chungin a hlawhtling nghal mai a, coaching lama a hlawhtlinna thuruk pawh hi Pep hnen atanga a zir chhuah a ni ngei ang.
“A chhuak tak tak dawn a nih pawhin Pep ngei hi amah thlaktu tur tal thlantir se la, a kalbo hnuah pawh hun rei tak a enkawl tawh team tana tha ber tur hnutchhiah a duh ngei ang.”